HOK Olımpıadany birneshe elde bir mezgilde ótkizýge ruqsat berdi
ASTANA. QazAqparat - Halyqaraly Olımpıada kómtıteti (HOK) Olımpıadalyq oıyndar ótkizý ótinimin berý rásimin ońaılatty, dep habarlady Bı-bı-sı.
Endi ózderinde jazǵy jáne qysqy Oıyndar ótkizý úshin tilek bildirýshilerge bul jeńil ǵana emes, arzanǵa da túspek.
Sonymen qatar, tarıhta alǵash ret jarystardy bir mezgilde birneshe qalalarda jáne elderde ótkizý múmkindigine jol beriledi.
HOK-tyń Monakoda ótken 127-shi sessııasynda uıym músheleri «Olımpıadalyq kún tártibi-2020» reformalary josparyn qabyldap, Oıyndardy ótkizýge ótinim berý erejelerin qaıta qaraýǵa daýys berdi,
Josparda sonymen qatar HOK-tiń óz olımpıadalyq telearnasyn qurý kózdelýde.
Kóptegen elderdi Oıyndardy ótkizýdiń joǵary baǵasy úrkitip otyr. Bul ásirese, Sochıdegi qysqy Olımpıada ótkizilgennen keıin ózekti bola tústi, bul oıyn uıymdastyrýshylarǵa 50 mlrd. dollardan astam shyǵynǵa túsken.
2022 jylǵy qysqy Oıyndar ótkizýden alty qalanyń tórteýi bas tartyp, ótinimderin qaıtaryp aldy. Olımpıadalyq dodadan óz bastamasymen Oslo, Lvov, Krakov jáne Stokgolm shyǵyp qaldy. Endi 2022 jylǵy Oıyndardy ótkizý úshin Almaty men Beıjiń ǵana básekege túsedi. HOK jarystardy ótkizýde qarjyny únemdeý úshin qazirgi qolda bar sport ǵımarattaryn belsendi paıdalanýǵa shaqyrýda.
Sondaı-aq HOK jazǵy jáne qysqy Olımpıadalardaǵy sport túrlerin kóbeıtýge sheshim qabyldady, alaıda jarysqa 10,5 myń atletti qatystyrýǵa lımıt engizdi. Máselen, Londondaǵy oıyndarda osynsha sportshy bolǵan.
Olımpıada-2012 medaldary 26 sport túrli boıynsha tapsyryldy, jańa ereje olardyń sanyn 28-ge deıin kóbeıtip otyr. Bul 2020 jylǵy Tokıoda ótetin Oıyndar baǵdarlamasyna beısbol men softboldy engizýge múmkindik beredi.
