HOK qysqy Olımpıada oıyndarynyń merzimin aýystyrýdy qarastyryp jatyr

ASTANA. KAZINFORM — Halyqaralyq Olımpıada komıtetiniń (HOK) prezıdenti Kırstı Koventrı bolashaq qysqy Olımpıada jáne Paralımpıada oıyndarynyń kestesi klımattyń ózgerýine baılanysty aı buryn erterek ótkizilýi múmkin ekenin málimdedi.

Sársenbi kúni keshke HOK-tyń 100-den astam múshesi Koventrıdiń «Bolashaqqa daıyndyq» baǵdarlamasy aıasyndaǵy kelissózderdiń kezekti raýndy aıasynda kezdesti. 

— Bolashaq qysqy Olımpıada jáne Paralımpıada oıyndaryn josparlaý úshin merzimdi qaıta qarastyrýymyz qajet bolýy múmkin. Eger oıyndardy erterek ótkizsek, bul balama sheshim bola alady, — dedi HOK basshysy baspasóz máslıhatynda.

Aıta ketý kerek, qysqy Olımpıada oıyndary dástúrli túrde aqpan aıynda ótedi. Usynylyp otyrǵan ózgeristerge klımattyń jylynýy sebep boldy, óıtkeni qar jamylǵysynyń turaqtylyǵy men jarystardy ótkizýge qaýip tónip tur. 

Belgili bolǵandaı, 2030 jylǵy Olımpıada Frantsýz Alpysynda 1–17 aqpan aralyǵynda, al 2034 jylǵy Olımpıada AQSh-tyń ıÝta shtatynda 10–26 aqpan aralyǵynda ótedi dep josparlanǵan.

Alaıda bolashaq qysqy Olımpıada oıyndaryn qańtar aıynda, al Paralımpıadany aqpan aıynda ótkizý múmkindigi de qarastyrylyp jatyr.

Jalpy, HOK buǵan deıin de klımattyń ózgerýi bolashaq jarystardy ótkizý orny men uıymdastyrýda qıyndyqtar týdyratynyn málimdegen edi.

Halyqaralyq Olımpıada komıtetiniń músheleri maýsym aıynda qaıta jınalyp, Olımpıadaǵa sholý nátıjelerine qaraı sheshim qabyldap, sondaı-aq 2030 jylǵy qysqy Olımpıada oıyndaryna jańa sport túrlerin engizý qajettigin talqylaıdy. 

Eske salaıyq, 6–22 aqpan aralyǵynda Italııanyń Mılan jáne Kortına-d’Ampetstso qalalarynda qysqy Olımpıada oıyndary ótedi. 

Avtor: Arýjan Jánádil