HOK Qazaqstannyń Olımpıadaǵa daıarlaý tájirıbesin álemdegi úzdik úlgi dep tanydy
ASTANA.KAZINFORM - Halyqaralyq Olımpıada komıteti (HOK) Qazaqstan Respýblıkasy Ulttyq Olımpıadalyq komıtetiniń Olımpıada jáne jasóspirimder Olımpıada oıyndaryna ulttyq quramalardy daıarlaý tájirıbesin álemdegi úzdik tájirıbelerdiń (Best Practice) qataryna qosty, dep habarlaıdy Qazaqstannyń ulttyq olımpıada komıteti.
HOK Qazaqstan UOK ázirlegen olımpıadalyq quramanyń múshelerimen jasalatyn Athlete and Team Official Agreements (ATOA) kelisimder júıesin erekshe atap ótti. Bul qujattar Halyqaralyq Olımpıada komıteti bekitetin standartty Conditions of Participation (CoP) qatysý sharttaryn tolyqtyrady. Standartty CoP-ten aıyrmashylyǵy, Qazaqstanda qoldanylatyn kelisimder ulttyq zańnama talaptaryna beıimdelip, uıymdastyrý jáne tájirıbelik sıpattaǵy barlyq mańyzdy máselelerdi tolyq qamtıdy.
HOK joǵary baǵalaǵan negizgi jańashyldyqtardyń biri – Olımpıada delegatsııasynyń ár sanatyna arnalǵan tórt bólek kelisimniń ázirlenýi. Atap aıtqanda, sportshylarǵa, jattyqtyrýshylar men medıtsına qyzmetkerlerine, BAQ ókilderine, sondaı-aq, ózge de resmı tulǵalarǵa arnalǵan jeke qujattar daıyndalǵan. Bul kelisimderdiń árqaısysynda biryńǵaı qurylym saqtalyp, barlyq talap naqty jazylǵan. Qujattarda minez-qulyq qaǵıdalary, HOK reglamentterin saqtaý, qarjylyq talaptar, jarys kezinde jeke áleýmettik jelilerdi paıdalaný tártibi, resmı sporttyq kıimdi kııý mindeti jáne týyndaýy múmkin quqyqtyq daýlardy sheshý joldary qamtylǵan.
HOK sarapshylary qujattardy ázirleý barysynda qoldanylǵan pánaralyq tásilge de erekshe nazar aýdardy. Kelisimder Olımpıada oıyndarynda ulttyq delegatsııany basqarǵan Chef de Mission jetekshileriniń tájirıbesine súıene otyryp ázirlengen. Sonymen qatar bul jumysqa Qazaqstan UOK-niń sport, halyqaralyq baılanystar, medıa, marketıng jáne quqyqtyq qamtamasyz etý baǵytyndaǵy mamandary tikeleı atsalysqan.
Halyqaralyq Olımpıada komıtetiniń baǵalaýynsha, Qazaqstan UOK tájirıbesi halyqaralyq standarttar men Olımpıadalyq hartııa qaǵıdalaryn ulttyq tájirıbege tıimdi engizýdiń tabysty úlgisi boldy. Osyǵan baılanysty HOK qazaqstandyq úlgini ózge ulttyq olımpıadalyq komıtetterge de usyndy. Bul Qazaqstanda qalyptasqan uıymdastyrý standarttarynyń halyqaralyq deńgeıde moıyndalǵanyn aıqyn kórsetedi.
Osyǵan deıin TsP-fýtboldan Qazaqstan ulttyq quramasy alǵash ret álem chempıonatyna qatysatyny týraly jazdyq.
