HOK Halyqaralyq boks qaýymdastyǵyn (IBA) moıyndaýdan bas tartty

LOZANNA. QazAqparat – Halyqaralyq Olımpıada komıteti (HOK) 22 maýsymda ótken kezekten tys sessııada Halyqaralyq boks qaýymdastyǵyn (IBA) moıyndaýdan bas tartty. Mundaı sheshim qabyldaýǵa 69 saılaýshy daýys bergen. Onyń bireýi ǵana bul sheshimge qarsy bolyp, taǵy 10 saılaýshy qalys qaldy, dep habarlaıdy QazAqparat DW-ge silteme jasap.

2019 jyly HOK boks qaýymdastyǵyndaǵy qarjylyq jáne basqarý daǵdarysyna baılanysty IBA-ny moıyndaýdan ýaqytsha bas tartqan. Odan reforma júrgizýdi talap etip, 2021 jyly Tokıoda ótetin Olımpıadada bokstan týrnır uıymdastyrýdan shettetti. Sondaı-aq IBA-ǵa bokstan 2024 jylǵy Parıj jáne 2028 jyly ótetin Los-Andjeles Olımpıadasy týrnırlerin uıymdastyrýǵa ruqsat etilmeıdi. Halyqaralyq boks qaýymdastyǵynyń mindetin ázirge HOK atqarady.

HOK bas dırektory Krıstof de Kepperdiń aıtýynsha, qaýymdastyq ózine qoıylǵan talaptardy oryndamaǵandyqtan, IBA-ny moıyndaýdan bas tartý týraly sheshim qabyldanǵan. Al IBA buǵan jaýap retinde «HOK úlken qatelik jiberdi» dep málimdedi.

«Búgingi sheshim álemdik boks úshin qaýipti ekenin jáne HOK-tyń bul isi boks pen sportshylardyń múddesine saı áreket etedi degen málimdemesine ashyq túrde qaıshy keletinin jasyra almaımyz», - delingen habarlamada.

2020 jyldyń sońynan bastap IBA-ny reseılik Ýmar Kremlev basqarady. Qaýymdastyq Reseı men Belarýs sportshylaryn óz qamqorlyǵymen ótetin jarystarǵa qatysý múmkindiginen aıyra qoıǵan joq. Buǵan jaýap retinde birneshe shtattyń, atap aıtqanda AQSh, Germanııa jáne Ulybrıtanııanyń ulttyq boks federatsııalary IBA-dan shyǵyp, ózderiniń World Boxing atty halyqaralyq qaýymdastyǵyn qurdy.