HOK Brazılııaǵa Olımpıada-2016 ótkizýge 1,5 mrd. dollar bóledi
ASTANA. QazAqparat - Halyqaralyq Olımpıada komıteti (HOK) Brazılııaǵa 2016 jyly Rıo-de-Janeıroda ótetin Olımpıadaǵa 1,5 mlrd. dollar bóledi. Bul týraly HOK basshysy Tomas Bah málim etti, dep habarlady komıtettiń saıty dep jazady RBK.
«HOK oıyndardy ótkizýge 1,5 mlrd. dollar bóledi», - dep málimdedi ol.
«Brazılııa álem chempıonatyn maqtanysh ete alady. Bul týrnır brazılııa halqynyń qushtarlyǵyn kórsetti. <...> Men el prezıdenti Dılma Rýsseftiń Olımpıadalyq oıyndar jóninde aıtqan senimin quptaımyn. Ol úshin Olımpıada oıyndary basymdyq bolyp tabylatynyn estigenime qýanyshtymyn», - dedi Bah.
Brazııalııa bıligi Olımpıada oıyndary aldynda Rıo-de Janeıronyń ınfraqurylymyn jaqsartýǵa 11 mlrd. dollar bólmek. Sonymen birge kólik pen qorshaǵan orta salasyndaǵy jobalardy damytýǵa memleketten de, jeke kompanııalardan da qarjy tartylmaq. Rıo-de-Janeıro meri Edýarda Paes Olımpıada qalanyń keıbir eski problemalaryn da sheshetinin atap ótti.
Degenmen birneshe aı buryn HOK Brazılııada birqatar olımpıadalyq nysandar salý áli bastalmaǵanyn, al Rıo-de-Janeıronyń daıyndyǵy 10 paıyz ǵana quraıtynyn málimdegen bolatyn. HOK vıtse-prezıdenti Djon Koýtstyń aıtýynsha, sport nysandaryn berý merzimi bekitilgen kesteden óte keıin qalyp keledi.
HOK qurylys qarqynyn budan buryn da synǵa alǵan bolatyn - 2013 jyly ol bul jaıynda alańdaýshylyǵyn da bildirdi. HOK-tiń arnaıy baıandamasynda ázlrlik jumystaryn qarjylandyrý úlken irkilistermen júzege asyrylyp otyrǵany aıtylǵan. Sondaı-aq baıandamada qarjynyń jetispeýshiligi, demeýshilerdiń joqtyǵy jáne qonaq úı nómirleriniń jetispeýi jóninde de aıtylǵan. Sporttyq nysandar qurylysynda jumysshylardyń ereýili de boldy. Aıtalyq, 5 sáýirde 2 myń adam barlyq jumystardy eki kún boıy toqtatty. Brazılııadaǵy jazǵy Olımpıadalyq oıyndar 2016 jylǵy 5-21 tamyz aralyǵynda ótýi tıis. Bul oıyndar Ońtústik Amerıka tarıhyndaǵy alǵashqy bolmaq. Rıo-de-Janeıro oıyndardy ótkizý quqyǵyn 2009 jyly HOK-tiń 121-sessııasyndaǵy daýys berý kezinde jeńip aldy. Brazılııalyq qalaǵa Madrıd, Tokıo jáne Chıkago básekeles bolǵan edi.
