Hlordan ýlanýy múmkin: Atyraýda basseınge túsken 3 adam aýrahanaǵa jatqyzyldy

ATYRAÝ. KAZINFORM – Atyraýdaǵy basseınde hlordan ýlanýdyń yqtımal deregi tirkeldi. Medıtsınalyq kómekke júgingen 14 adamnyń 3-eýi aýrýhanaǵa jatqyzyldy. 

Atyraý óńirlik kommýnıkatsııalar qyzmetiniń málimetine qaraǵanda, oqıǵa búgin, 13 shildede bolǵan.

– Atyraýdaǵy basseınderdiń birinde hlordan ýlanýdyń yqtımal jaǵdaıy tirkeldi. Medıtsınalyq kómekke 14 adam júgindi. Aýrýhanaǵa 3 adam jatqyzyldy. Dárigerler olardyń jaǵdaıyn turaqty dep baǵalady. Ózgeleri dárigerlerdiń baqylaýyna alyndy, - dep habarlady óńirlik kommýnıkatsııalar qyzmeti. 

Atyraý oblysynyń ákimi Serik Shápkenov atalǵan oqıǵaǵa baılanysty densaýlyq saqtaý basqarmasyna zardap shekkenderdiń jaǵdaıyn baqylaýda ustaýdy tapsyrdy. Sondaı-aq basqarmaǵa basseınder men akvaparkterdiń jumysyn tekserý júkteldi. 

– Basseınde epıdemııaǵa qarsy is-sharalar júrgizildi. Aýa men sýdan synama alyndy. Hlor býy shekti mólsherden aspaǵan, zerthanalyq taldaý jumystary jalǵasyp jatyr, - dep málim etti óńirlik kommýnıkatsııalar qyzmetinen. 

Atyraý oblystyq polıtsııa departamentiniń baspasóz qyzmeti basseındegi oqıǵaǵa qatysty qylmystyq is qozǵalǵanyn rastady. 

– Qylmystyq is tirkeldi. Tergeý júrgizilip jatyr. Ózge aqparat tergeý múddesine sáıkes jarııalaýǵa jatpaıdy, - dep habardar etti departamenttiń baspasóz qyzmeti. 

Eske sala ketelik, budan buryn Atyraýda aýa temperatýrasy +43 gradýsqa deıin kóterilip, qatty ystyq bolýy múmkin ekenin jazǵan bolatynbyz.