HQO-ny Baılanys jáne aqparat mınıstrligine berýge arnalǵan zań jobasy kelisim komıssııasynda talqylanatyn bolady
ASTANA. 1 maýsym. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine halyqqa qyzmet kórsetý ortalyqtarynyń máseleleri boıynsha ózgerister men tolyqtyrýlar engizý týraly» zań jobasyna Senat tarapynan engizilgen túzetýlerdi talqylady.
Nátıjesinde qos palata arasyndaǵy kelispeýshilikterdi eńserý úshin kelisim komıssııasyn qurý týraly sheshim qabyldandy.
Esterińizge sala keteıik, zań jobasynyń negizgi maqsaty - Halyqqa qyzmet kórsetý ortalyqtarynyń qyzmetin uıymdastyrý jónindegi fýnktsııalardy jergilikti atqarýshy organdardyń quzyretinen alyp Baılanys jáne aqparat mınıstrligine berý bolyp tabylady. Zań jobasy, sondaı-aq aqparattandyrý salasyndaǵy ýákiletti organǵa HQO-lardyń qyzmetin ádisnamalyq qamtamasyz etý, olardyń jumys isteýin baqylaý jáne memlekettik qyzmet kórsetýdi avtomattandyrý ókilettikterin beredi.
Toqtala ketetin jaıt, 2005-2009 jyldar aralyǵynda HQO Ádilet mınıstrliginiń quzyrynda bolyp, 2010 jyly jergilikti atqarýshy organdardyń qaramaǵyna berildi. Qazirgi tańda osy Ortalyqtardyń qyzmetin jaqsartý úshin qajetti normatıvtik baza qalyptasty. Ádilet mınıstrligi qysqa merzimde ortalyqtardyń jumysyn joǵary deńgeıde uıymdastyra aldy. Biraq, olardy jergilikti atqarýshy organdardyń qaramaǵyna berý halyqqa qyzmet kórsetýdiń sapasyna keri áserin tıgizdi. Osyǵan baılanysty Memleket basshysy qyzmet kórsetý ortalyqtarynyń fýnktsııalaryn Baılanys jáne aqparat mınıstrligine berýdi tapsyrǵan bolatyn. Zań jobasymen «bir tereze qaǵıdaty», «halyqqa qyzmet kórsetý ortalyǵy», «áleýmettik mańyzy bar qyzmet kórsetý» degen uǵymdar ashyp kórsetildi.
Qujat boıynsha aqparattandyrý salasyndaǵy ýákiletti organnyń kýálandyrýshy ortalyqty akkredıtteý týraly kýálikti berýdiń, sondaı-aq onyń qoldanysyn toqtata turýdyń, qaıta jańartýdyń, toqtatýdyń tártibin reglamentteıtin tolyqtyrý engizilgen bolatyn. Senatorlar dál osy tolyqtyrýdy alyp tastaýdy usynǵan edi. Bul rette senatorlar ruqsat etý qujaty retindegi akkredıtteý týraly kýálikten aıyrýdy tek sot qana júrgize alady degen ýájdi alǵa tartqan. Alaıda, Májilis depýtattary bul máselede óz ustanymdarynda qalatyn bolyp, kelisim komıssııasyn qurýdy uıǵardy.
