HQO mamandary 65 jastan asqandardyń úıine baryp qyzmet kórsetedi

NUR-SULTAN. QazAqparat - Eger buryn halyqqa qyzmet kórsetý ortalyǵynyń mamandaryn úıine erekshe qajettiligi bar, 1-2 toptaǵy múgedekter men Uly Otan soǵysynyń ardagerleri ǵana shaqyrta alsa, endi 65 jastan asqan azamattar da memlekettik qyzmetterdi úıden ala alady. Bul Qazaqstanda birqatar shekteý sharalarynyń engizilýine baılanysty. Óıtkeni elimizde 65 jastan asqan adamdardyń qozǵalysyna shekteý qoıylǵan, dep habarlaıdy QazAqparat.

Memlekettik korporatsııa qyzmetkerin úıge shaqyrtý úshin azamat nemese onyń qamqorshysy 1414 nómiri boıynsha biryńǵaı baılanys ortalyǵyna qońyraý shalyp, qyzmetke suranys qaldyrýy kerek. Budan keıin Azamattarǵa arnalǵan úkimettiń mamandary ótinish qaldyrýshymen baılanysyp, qujattardyń tolyqtyǵyn naqtylaıdy jáne úıge baryp memlekettik qyzmet kórsetýdiń kúni men ýaqytyn belgileıdi. Aıta ketetini, qyzmetkerler ótinishti qabyldaǵannan keıin qyzmet alýshyǵa 7 jumys kúninen keshikpeı barýy kerek.

«Azamattarǵa arnalǵan úkimet» memlekettik korporatsııasynyń basqarma tóraıymy Ásemgúl Baltashevanyń aıtýynsha, bıylǵy jyldyń 7 aıynda memlekettik korporatsııa qyzmetkerleri úı-úıge baryp 22 myńnan astam memlekettik qyzmet kórsetken. «Mobıldi topty úıge shaqyrý kezinde halyqty qujattandyrý qyzmetin kóshi-qon polıtsııasynyń qyzmetkerleri júzege asyratynyn eskerý qajet. Sondyqtan, eger jeke kýálikti jaramdylyq merzimi aıaqtalýyna baılanysty aýystyrý qajet bolsa, úıge barý jáne qujatty daıyndaý ýaqytyn eskere otyryp, ótinishti kem degende 2 apta buryn qaldyrýǵa keńes beremiz», – dep atap ótti Baltasheva.

Esterińizge sala keteıik, úıge shaqyrtý barysynda alynatyn eń tanymal qyzmetterdiń ishinde tólqujattar men jeke kýálikter berý, múgedekterdi sýrdo-teflotehnıkalyq jáne mindetti gıgıena quraldarymen qamtamasyz etý, múgedekterge protezdik-ortopedııalyq kómek kórsetý úshin tıisti qaǵazdaryn daıyndaý sııaqty qyzmetter bar.

Memlekettik korporatsııa qyzmetkerleri koronavırýs pandemııasy jaǵdaıynda qyzmetterdi barlyq qaýipsizdik sharalaryn saqtaı otyryp kórsetedi. Barlyq maman maska jáne antıseptıkpen qamtamasyz etilgen.

Qyzmet alýshylarmen baılanysty azaıtý úshin HQO mamandary dálizden ary ótpeı, áleýmettik qashyqtyqty saqtaıdy.