HQO qyzmetkerleriniń mártebesi ósedi

ASTANA. QazAqparat – HQO qyzmetkerleri memlekettik fýnktsııalardy oryndaýǵa ýákilettik berilgen tulǵalarǵa teńestiriledi. Bul jaıynda Premer-Mınıstr Álıhan Smaıylov Májilis depýtattarynyń saýalyna bergen jaýabynda málim etti, dep habarlaıdy QazAqparat tilshisi.

«Memlekettik korporatsııa qyzmetkerleriniń mártebesin aıqyndaýǵa kelsek, Parlament Májilisiniń depýtattary bastama jasaǵan «Qazaqstan Respýblıkasynyń keıbir zańnamalyq aktilerine Memlekettik korporatsııa máseleleri boıynsha ózgerister men tolyqtyrýlar engizý týraly» zań jobasy sheńberinde «Azamattarǵa arnalǵan úkimet» memlekettik korporatsııasy qyzmetkerleriniń mártebesi men jaýapkershiligin arttyrý jónindegi túzetýler qoldaý tapty. Bul túzetýde olardy memlekettik fýnktsııalardy oryndaýǵa ýákilettik berilgen tulǵalarǵa teńestirý kózdelgen» dep jazady Álıhan Smaıylov.

Al olarǵa baspana alý máselesinde jeńildik berý týraly usynys bıýdjet tapshylyǵyna baılanysty qoldaý tappaǵan.

«Bul rette memlekettik bıýdjetke túsetin júkteme ulǵaıyp ketetindikten memlekettik korporatsııa qyzmetkerlerine memlekettik (jergilikti) turǵyn úı qorynan turǵyn úı alýǵa kezekke turý, turǵyn úıdi jalǵa alǵany úshin shyǵystardy óteý quqyqtaryn berý bóligindegi túzetýler, sondaı-aq ózge de jeńildikter qoldaý tappady», - delingen jaýapta.