HQO qandastarǵa qyzmet kórsetetin bólimder ashylyp jatyr

ASTANA. QazAqparat – Elimizdiń birneshe qalasynda Halyqqa qyzmet kórsetý ortalyqtarynda qandastarǵa qyzmet kórsetetin bólimder ashylýda, dep habarlaıdy QazAqparat tilshisi.

QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Astanadaǵy Halyqqa qyzmet kórsetý ortalyqtarynyń birine bardy.

«Búgin Astanadaǵy Halyqqa qyzmet kórsetý ortalyqtarynyń birine baryp, otanymyzǵa oralǵan qandastarymyz úshin jasalǵan qyzmet kórsetý bólmesiniń qalaı jumys isteıtinin kórdim. Qandastarymyz úshin memlekettik qyzmetterdi, onyń ishinde JSN men turýǵa yqtııarhat alý alýǵa, «qandas» mártebesin berýge, jeke kýálik jáne taǵy basqa qyzmetterdi jyldam alýǵa arnalǵan arnaıy jeke terezeler iske qosylǵanyn atap ótemin. Bul terezeler barlyq qyzmetterdi qas-qaǵym sátte, jedel alýǵa múmkindik beredi», - dep jazdy mınıstr Facebook jelisinde.

Mınıstrdiń aıtýynsha, ázirge bul qyzmet Astana, Almaty, Oral, Aqtóbe qalalarynda qoljetimdi.

«Biraq jaqyn arada elimizdiń basqa óńirlerinde de iske asyrýdy josparlap otyrmyz», - deıdi B. Mýsın.