HQKO mańynda túrli kómekshiler ortalyq jumysyna nuqsan keltirip jatyr - Mádı Sadanov

ASTANA. KAZINFORM – Halyqqa qyzmet kórsetý ortalyǵynyń mańynda júretin túrli kómekshilerdiń qyzmetin toqtatý múmkin bolmaı tur. Bul týraly elorda máslıhatyndaǵy qoǵamdyq tyńdaýlar kezinde «Azamattarǵa arnalǵan úkimet» KEAQ Astana qalasy boıynsha fılıalynyń dırektory Mádı Sadanov aıtty.

«Halyqqa qyzmet kórsetý ortalyǵynyń mańynda tegin qyzmetti aqshaǵa satatyn «pomogaıkalar», ıaǵnı túrli kómekshiler júredi. Olar arnaıy ruqsatsyz ári zańsyz árekettermen aınalysyp, ortalyqtaǵy bólimderdiń jumysyna kedergi jasap jatyr», - dedi M. Sadanov.

Onyń paıymynsha, atalǵan kómekshilerdiń is-qımyly memlekettik korporatsııanyń bedeline nuqsan keltirip otyr.

«Olardyń áreketi memlekettik qyzmetterdiń sapasyna teris áser etedi jáne qoldanystaǵy zańnamany buzýǵa jaǵdaı jasaıdy. Fılıaldyń tıisti ókilettigi bolmaǵandyqtan, bul adamdarǵa qatysty eshqandaı shara qoldana almaıdy. Degenmen, bul kómekshilerdiń zańsyz áreketterin anyqtaý, sondaı-aq tosqaýyl qoıý boıynsha Іshki ister departamentine jáne Memlekettik kirister departamentine birneshe ret hat joldandy. Qazir atalǵan másele boıynsha áli de eshqandaı sheshim qabyldanbady. Sondyqtan osy problemanyń sheshimin tabýǵa yqpal jasaý kerek», - dedi fılıal dırektory.