HQKO mamandary І top múgedekteriniń úılerine baryp memlekettik qyzmet kórsetetin bolady

ASTANA. 3 qazan. QazAqparat - Astana men Almatynyń Halyqqa qyzmet kórsetý ortalyqtarynda ilki rejimde úıge kelip memlekettik qyzmet kórsetý jobasy iske qosyldy.

Mundaı qyzmetpen HQKO-larǵa óz betimen kelýge múmkindigi joq І toptaǵy múgedek azamattar memlekettik qyzmet alý maqsatynda paıdalana alady.

Memlekettik qyzmetterdi avtomattandyrýǵa baqylaý jasaý jáne HQKO qyzmetin úılestirý komıtetiniń tóraǵasy Baǵdat Mýsın «memlekettik qyzmet kórsetýdiń bekitilgen standarttaryna sáıkes memlekettik qyzmetti alý úshin ótinim berýshi HQKO-na jeke ózi júginýge tıis. Múmkindigi shekteýli tulǵalarǵa bul talapty oryndaý dúdámal bolǵandyqtan mundaı adamdarǵa HQKO-nyń qyzmetkerleri ózderi soǵatyndyǵyn» eske saldy.

Bul úshin múmkindigi shekteýli adam memlekettik qyzmet kórsetý qajet bolǵan jaǵdaıda Biryńǵaı baılanys ortalyǵyna 1414 telefon nomeri arqyly qońyraý shalyp, óziniń derekterin habarlap, qyzmet alý úshin qajetti qujattardyń tizbesin bilip, ótinim qaldyrýy kerek. Budan keıin klıentpen qolaıly ýaqyt kelisilgen soń HQKO-nyń qyzmetkeri qyzmet kórsetý úshin onyń úıine barady.

Buǵan qosa B.Mýsın bıylǵy jyldyń aıaǵyna deıin dál osyndaı qyzmet túri respýblıkanyń basqa da qyzmet kórsetý ortalyqtary arqyly qoljetimdi bolatyndyǵyn atap kórsetti.