HQKO-lardy jergilikti atqarýshy organdarǵa berý onyń qyzmetine oń áser etedi -S.Ábish
ASTANA. Jeltoqsannyń 14-i. QazAqparat /Marlan Jıembaı/ - Halyqqa qyzmet kórsetý ortalyqtaryn jergilikti atqarýshy organdarǵa berý onyń qyzmetine oń áser etedi.
Bul pikirdi búgin elordada atalǵan ortalyqtardy jergilikti atqarýshy organdarǵa berý máselesi boıynsha ótken semınar keńeste Ádilet mınıstrliginiń jaýapty hatshysy Samat Ábish bildirdi, dep habarlaıdy QazAqparat.
Onyń aıtýynsha, qazirgi ýaqytta elimizde mundaı ortalyqtardyń sany 316-ǵa, al onda halyqqa kórsetiletin memlekettik qyzmetterdiń túri 57-ge jetken. Halyqqa qyzmet kórsetý ortalyqtaryn jergilikti atqarýshy organdarǵa berý barysyndaǵy negizgi maqsattardyń biri - HQKO-lardy ustap turý úshin 2010-2012 jyldarǵa bólingen qarjyny bólý jáne osy ortalyqtardyń qyzmetin uıymdarýshy jergilikti atqarýshy organdardyń quziretin tolyqtyrý.
«Meniń oıymsha, osymen bizdiń jumys aıaqtalǵan joq. Mınıstrlik ádistemelik kómek kórsetý sheńberinde ádilet organdarynyń memlekettik qyzmetterin kórsetýde sizdermen birlesip áreket etip, halyqqa qyzmet kórsetý ortalyqtaryn damytýǵa belsendi atsalysatyn bolady», dedi S.Ábish.
Qazirgi ýaqytta HQKO-lardy ustap turýǵa maqsatty transfertter túrinde respýblıkalyq bıýdjetten qarjyny jergilikti bıýdjetke qaıtadan bólýdi qarastyrǵan «2010-2012 jyldarǵa arnalǵan respýblıkalyq bıýdjet týraly» Zań qabyldandy. Sonymen qatar HQKO-lardyń qyzmetterin uıymdastyrý boıynsha jergilikti atqarýshy organdardyń quziretin qarastyratyn «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańǵa ózgertýler qarastyryldy.
Aıta keteıik, bul ortalyqtardy qurý ıdeıasyn 2005 jyly Memleket basshysy óziniń Qazaqstan halqyna arnaǵan joldaýynda aıtqan bolatyn. Osyǵan oraı sol jyly Ádilet mınıstrligi Astana men Almaty qalalarynda 4 HQKO-ny tájirıbe retinde qurdy. Tájirıbe óziniń tıimdiligin jáne halyqqa qajettiligin kórsetip otyr.
