HQKO-larda jańa tólqujat alý úshin dúrbeleń týyndaǵan joq - QR ІІM
ASTANA. QazAqparat - Elimizdiń halyqqa qyzmet kórsetý ortalyqtarynda el azamattarynyń jańa tólqujat alýy úshin dúrbeleń týyndaǵan joq. Bul jaıynda QR ІІM Memlekettik til jáne aqparat departamentiniń dırektory Almas Sadýbaev málim etti, dep habarlaıdy QazAqparat.
«Aǵymdaǵy jyldyń 25 jeltoqsanynda jańa Salyq kodeksi qabyldandy. Onda 2018 jyldyń 1 qańtarynan bastap Qazaqstan Respýblıkasy azamatynyń tólqujatyn bergeni úshin memlekettik salyqty 4-ten (2017 jyly 8076 teńge) 8 aılyq (2018 jyly 19240 teńge) eseptik kórsetkishke deıin ulǵaıtý qarastyrylǵan. Osyǵan baılanysty HQKO-ǵa tólqujat alý úshin júgingen azamattardyń sany artty. Óıtkeni, qoldanystaǵy zańnamaǵa sáıkes túri ózgergen qujattardy aýystyrý azamattardyń qalaýy boıynsha júzege asyrylady. Azamattardyń kóptep kelýi negizinen iri qalalarda, Astana, Almaty, Shymkentte baıqalady. Osyǵan oraı kóshi-qon qyzmetiniń bólimshelerimen qalalardaǵy jáne oblystardaǵy HQKO-da jumys oryndarynyń sanyn arttyrý sharalary qabyldandy. Halyqty qabyldaý shtattyq jumys rejiminde júrgizilýde, halyqtyń kóptep shoǵyrlanýy baıqalmaıdy», - dedi ol.
Osy rette Almas Sadýbaev «Qazaqstan Respýblıkasy azamatynyń jeke basyn kýálandyratyn qujattar týraly» Zańnyń 9 babyna sáıkes onyń aýmaǵynda turaqty turatyn azamattar 16 jasqa tolǵannan keıin beriletin jeke kýálikke ıelik etýge mindetti ekendigin eske saldy.
«Qazaqstan Respýblıkasy azamatynyń tólqujaty Qazaqstan Respýblıkasynyń azamatyna olardyń qalaýy boıynsha jasyna qaramastan beriledi jáne azamattyń jeke tulǵasyn Qazaqstanda jáne odan tysqary aýmaqta kýálandyrady», - dedi departament basshysy.
Onyń sózine qaraǵanda, jeke basty kýálandyratyn qujattardy daıyndaýdyń negizgi shyǵyndaryn memleket óteıtindigine qaramastan birneshe jyl boıy tólqujat pen jeke kýálik berý úshin memlekettik salyq ózgermegen.
