HQKO-larda salyq organdary qyzmetteriniń tizbesi artty
ASTANA. QazAqparat - HQKO-lar salyq organdarynyń baǵyty boıynsha pılottyq rejımde taǵy da 8 qyzmetti kórsetýdi bastady. Buǵan deıin HQKO-lar atalǵan vedomstvonyń 17 qyzmetin usynǵan bolatyn. Endi qyzmetter tizbesi keńeıtildi jáne Qarjy mınıstrligi Memlekettik kirister komıtetiniń HQKO-ǵa bergen qyzmetter sany 25-ke kelip jetti, dep habarlaıdy «HQKO» RMK baspasóz qyzmetinen.
Atap aıtsaq, endi HQKO-larǵa salyq tóleýshilerdi tirkeý, salyq tóleýshini tirkeý esebine alý, QR-daǵy kózderden alynǵan kirister somasy jáne ustalǵan (tólengen) salyqtar týraly anyqtama, sondaı-aq QR rezıdenttigin rastaý jáne t.b. úshin júginýge bolady.
Buryn qazaqstandyqtar atalǵan qyzmetterdi QR Qarjy mınıstrligi Memlekettik kirister komıtetiniń aýmaqtyq organdarynan ǵana ala alatyn. Endi olardy memlekettik organdar jáne balamaly negizde halyqqa qyzmet kórsetý ortalyqtary kórsetedi. Qyzmetterdi resimdeý úshin HQKO-ǵa dúısenbiden bastap senbini qosa, túski úzilissiz tańǵy saǵat 9.00-den bastap keshki saǵat 20.00-ge deıin júginýge bolady.
«HQKO» RMK bas dırektory Ásemgúl Baltashevanyń aıtýyna qaraǵanda, pılottyq qyzmetterdiń basym bóligi tolyǵymen avtomattandyrylǵan jáne olardy HQKO-lardyń elektrondyq úkimet portalynda, sondaı-aq «Connection Point» sektorlarynda óz betinshe alýǵa bolady. «Bul úshin elektrondyq kezek talonyn alý qajet emes, onlaın qyzmetti alý úshin elektrondyq tsıfrlyq qoltańba bolsa ǵana jetkilikti. ETsQ bolmaǵan jaǵdaıda HQKO ınspektorlary klınetterge ony jeke kýálikke ne flesh-kartaǵa jazyp berýge kómektesedi», - dep atap ótti ol.
Á.Baltasheva qazirgi ýaqytta kórsetiletin qyzmetterdiń standarttary kelisý ústinde ekendigin aıtyp ótti. Olar bekitilisimen pılottyq joba aıaqtalyp, qyzmetter HQKO-larda jalpy negizderde kórsetiletin bolady.
Búgingi kúni Qazaqstanda 212 memlekettik qyzmetti kórsetetin 267 halyqqa qyzmet kórsetý ortalyǵy jumys jasaıdy. 2015 jylǵy 10 aıda QR HQKO-larynda 30 mılıonnan astam qyzmet, onyń ishinde 22 mıllıon qyzmet - elektrondyq nysanda kórsetildi.
