HQKO-larda «qandastarǵa» memlekettik qyzmetti bir mezgilde kórsetý tetigi iske qosylady
«Zańnamaǵa sáıkes qandastarǵa «Eńbek» nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasy aıasynda «Eńbek naryǵy» avtomattandyrylǵan aqparattyq júıesi arqyly júzege asyrylatyn erikti túrde qonys aýdarýdy qoldaý sharalaryn qosa alǵanda, halyqty jumyspen qamtý salasyndaǵy kórsetiletin qyzmettermen qamtamasyz etýge qandastarǵa Qazaqstan Respýblıkasynyń azamattarymen teń múmkindik beriledi. Sonymen qatar Memleket basshysynyń (2020 jylǵy 22 qazanda Ulttyq qoǵamdyq senim keńesiniń tórtinshi otyrysynda berilgen) «Eńbek» memlekettik baǵdarlamasy aıasynda qonys aýdarýshylarǵa jáne qandastarǵa soltústik óńirlerge kóshýge beriletin sýbsıdııalar mólsherin 2 ese – 35-ten 70 AEK-ke deıin ulǵaıtýǵa qatysty tapsyrmasyn iske asyrý boıynsha Úkimet qaýlysynyń jobasy ázirlendi», - dedi Asqar Mamın.
Onyń aıtýynsha, tarıhı otanyna shetelden oralǵan qandastarǵa konsýltatsııalyq jáne aqparattyq qoldaý kórsetý maqsatynda Almaty jáne Shymkent qalalarynda, sondaı-aq Almaty, Aqmola, Soltústik Qazaqstan, Shyǵys Qazaqstan, Qaraǵandy, Qostanaı, Pavlodar jáne Jambyl oblystarynda «Qandastardy aqparattyq qoldaý ortalyqtary» (front ofıster) quryldy.
«Atalǵan front ofıster 2020 jyly qandastardyń 5 myńnan astam ótinishin qarady. «Azamattarǵa arnalǵan úkimet» memlekettik korporatsııasymen birlesip, «bir tereze» qaǵıdaty boıynsha «qandastarǵa» memlekettik qyzmet kórsetý kezinde bıznes-protsesterdi ońtaılandyrý jónindegi jol kartasy iske asyrylýda», - dedi Úkimet basshysy.
Asqar Mamınniń atap ótýinshe, osy jyldyń II toqsanynda Halyqqa qyzmet kórsetý ortalyqtarynda óńirlik kvotaǵa engizýdi, turaqty turýǵa ruqsat alýdy jáne jeńildetilgen tártippen Qazaqstan Respýblıkasynyń azamattyǵyna qabyldaýdy kózdeıtin «qandastarǵa» memlekettik qyzmetti bir mezgilde kórsetý iske qosylatyn bolady.
«Budan basqa, qandastardy beıimdeý jáne ıntegratsııalaý ortalyqtarynda (Qaraǵandy, Túrkistan oblystary jáne Shymkent qalasy) aqparattyq-anyqtamalyq qyzmetter kórsetiledi. Onyń ishinde Qazaqstan Respýblıkasynyń tarıhy, mádenıeti men dástúrleri, zańnama negizderi jáne shaǵyn bıznes ashý boıynsha oqytý kýrstaryn ótkizý, qandastardyń qoǵamǵa beıimdelýi men ıntegratsııasyn jedeldetýge yqpal etetin jumysqa ornalasýǵa kómek kórsetiledi», - dedi Premer-Mınıstr.
