HQO: Qazaqstanda beıneqońyraý arqyly 72 myńnan astam ótinish qabyldandy
ORAL. KAZINFORM — Búginde «TsON» mobıldi qosymshasy arqyly kórsetiletin beıneqońyraý formatynda 79 memlekettik qyzmet qoljetimdi.
«Azamattarǵa arnalǵan úkimet» memlekettik korporatsııasy» KEAQ BQO fılıalynan málim etkenindeı, 2025 jyly bul servıs arqyly Qazaqstanda 72 myńnan astam ótinish qabyldanǵan.
Beınebaılanys naqty ýaqyt rejıminde jumys isteıdi: operator beıneqońyraý arqyly keńes beredi, qujattardy toltyrýǵa kómektesedi jáne ótinishti onlaın qabyldaıdy.
Bir beıneqońyraýdyń ortasha uzaqtyǵy — 5–15 mınýt, bul kóptegen máseleni jedel sheshýge múmkindik beredi.
Beıneqońyraý arqyly 79 memlekettik qyzmet kórsetiledi. Olardyń qatarynda sottylyǵy týraly anyqtama alý, turǵylyqty jeri boıynsha tirkelý, áleýmettik tólemderdi rásimdeý jáne kópbalaly otbasylarǵa járdemaqy taǵaıyndaý sııaqty qyzmetter bar.
Qyzmetti paıdalaný úshin «TsON» mobıldi qosymshasyn ashyp, «HQKO qyzmetteri» bólimine ótip, «Beıne qyzmeti» bólimshesin tańdap, «Beıne qońyraýǵa ótý» batyrmasyn basý qajet. Operator keńes berip, ótinishti rásimdeıdi, al nátıjesin qosymshadaǵy chat arqyly nemese daıyn qujatty HQKO bólimshesinen alýǵa bolady.
— Beıneqyzmet shalǵaı eldi mekenderdiń turǵyndaryna jáne erekshe qajettilikteri bar azamattar úshin memlekettik qyzmetterdi qoljetimdi etýge múmkindik beredi. Sonymen qatar servıs memlekettik qyzmetterdiń tsıfrlyq transformatsııasynyń bir bóligi bolyp esepteledi. Tsıfrlandyrý jáne jasandy ıntellekt jyly aıasynda basty nazar azamattarǵa yńǵaıly ári sapaly qyzmet usynýǵa baǵyttalǵan, - dep habarlady memlekettik korporatsııadan.
Eske sala keteıik, budan buryn jyljymaıtyn múliktiń biryńǵaı memlekettik kadastry boıynsha 100 mln ótinim túskenin jazǵan bolatynbyz.
