HQKO-ǵa júginýdiń 79 paıyzyn quraıtyn 10 qyzmet onlaın formatqa kóshirildi
ASTANA. KAZINFORM – Qazaqstanda azamattardyń Halyqqa qyzmet kórsetý ortalyqtaryna (HQKO) júginýiniń shamamen 79 paıyzyn quraıtyn eń kóp suranysqa ıe 10 memlekettik qyzmet onlaın formatqa kóshirildi. Bul týraly Úkimettegi brıfıngte Jasandy ıntellekt jáne tsıfrlyq damý birinshi vıtse-mınıstri Rostıslav Konıashkın aıtty.
Onyń aıtýynsha, atalǵan qyzmetterdi onlaın formatqa kóshirý jumysy is júzinde aıaqtalǵan.
– Biz azamattardyń HQKO-ǵa júginýiniń shamamen 79 paıyzyn quraıtyn eń kóp suranysqa ıe 10 qyzmetti onlaın formatqa kóshirý jumysyn is júzinde aıaqtadyq. Qazir shetel azamattaryna qatysty bir qyzmetti onlaın formatqa aýystyrý máselesi qaralyp jatyr, – dedi spıker.
Sonymen qatar taǵy 12 memlekettik qyzmetti balamasyz formatqa kóshirý josparlanyp otyr.
Bul jaǵdaıda azamat HQKO-ǵa kelgen kezde qyzmetti operator arqyly emes, ózine-ózi qyzmet kórsetý sektorynda mamandardyń konsýltatsııalyq kómegimen alady.
Spıkerdiń aıtýynsha, memlekettik qyzmetterdi osyndaı formatqa kóshirý HQKO operatorlaryna túsetin júktemeni azaıtýǵa múmkindik bergen.
– Bıylǵy jyldyń birinshi jartyjyldyǵyn ótken jyldyń birinshi jartyjyldyǵymen salystyrǵanda, HQKO operatorlaryna júginý sany shamamen 30 paıyzǵa azaıdy, – dedi mınıstrlik ókili.
Sonymen qatar tsıfrlandyrýǵa baılanysty HQKO qyzmetkerleri qysqartylmaıtynyn jazǵanbyz.
