HQKO-ǵa eń kóp baratyndar qaı óńirde turady
ASTANA. KAZINFORM — Qazaqstandyqtar HQKO-ǵa 2,5 mıllıonnan astam ótinish bergen. Mekemege júginý boıynsha Almaty kósh bastady.
«Azamattarǵa arnalǵan úkimet» memlekettik korporatsııasynyń baspasóz qyzmetiniń derekterine sáıkes, bıylǵy jyldyń III toqsanynda Qazaqstan turǵyndary halyqqa qyzmet kórsetý ortalyqtary arqyly memlekettik qyzmetterdi alý úshin 2,5 mıllıonnan astam ótinish bergen.
Bul rette memlekettik korporatsııa ótinishter sany eń kóp óńirler qataryn anyqtady.
— Birinshi orynda Almaty qalasy tur. Munda 531 324 ótinish qabyldanǵan. Ekinshi orynda — Astana qalasy, onda 256 739 ótinish tirkelgen. Úshinshi orynda 217 327 ótinish tirkelgen Túrkistan oblysy tur. Al Ulytaý oblysy osy kezeńde tirkelgen ótinishter sany boıynsha eń sońǵy orynda, — delingen habarlamada.
Osyǵan deıin HQKO-ǵa júginýdiń 79 paıyzyn quraıtyn 10 qyzmet onlaın formatqa kóshirilgenin jazdyq.
