HQKO-da kadrlyq ózgerister boldy
ASTANA. 25 mamyr. QazAqparat - Elimizdegi Halyqqa qyzmet kórsetetin ortalyqtarda (HQKO) kadrlyq ózgerister boldy. Bul týraly QazAqparat QR Baılanys jáne aqparat mınıstrliginiń baspasóz qyzmetine silteme jasap habarlaıdy.
"QR Baılanys jáne aqparat mınıstrligi Halyqqa qyzmet kórsetý ortalyǵynyń jumysyn úılestirý jáne memlekettik qyzmetterdi avtomattandyrýdy baqylaý jónindegi Komıteti (ári qaraı-Komıtet) aǵymdaǵy jyldyń 4 mamyrynda ótken Baılanys jáne aqparat mınıstrliginiń HQKO-nyń jumysyn retteý máselesi boıynsha keńeıtilgen otyrysynyń Hattamasyn júzege asyrý maqsatynda sybaılas jemqorlyq pen memlekettik qyzmet kórsetýdiń belgilengen standarttary men reglamentin saqtamaý faktilerine qatysty qyzmettik tekserý júrgizdi", - delingen baspasóz qyzmetiniń habarlamasynda.
Baspasóz qyzmetiniń mlimetterinshe, «Almaty qalasynyń Medeý aýdandyq Halyqqa qyzmet kórsetý ortalyǵy» respýblıkalyq memlekettik mekemesiniń jumysyna júrgizgen monıtorıng jáne qyzmettik tekserý qorytyndysynda HQKO dırektorynyń uıymdastyrý jumystaryn nashar júrgizgeni anyqtaldy. Almaty qalasy Medeý aýdandyq HQKO-nyń basshysy A.A. Tortaev qyzmetinen bosatyldy.
Almaty aýdandyq HQKO-nyń dırektory N.E. Sadyqovqa HQKO-nyń basshylyq quramynyń arasynda sybaılas jemqorlyqqa qatysty aldyn-alý sharalaryn nashar uıymdastyrǵany úshin qatań sógis jarııalandy.
Buǵan qosa, Komıtet Tóraǵasynyń buıryǵymen Qostanaı oblystyq HQKO-nyń dırektory A.A. Bogdanovqa HQKO jumysy men sybaılas jemqorlyqty boldyrmaýdyń aldyn-alý sharalaryn nashar uıymdastyrǵany úshin qatań sógis jarııalandy.
Keńeıtilgen otyrysta jumysy qatań synǵa ushyraǵan Astana qalasynyń Almaty aýdandyq HQKO-nyń dırektory T. Áýbákirovtiń qyzmetten óz erkimen ketý jónindegi aryzy qanaǵattandyryldy. Buǵan qosa, onyń eki orynbasary B. Turǵynov pen T. Saǵynaev óz erikteri boıynsha jumystan bosatý týraly aryz berdi.
Komıtet Tóraǵasynyń buıryǵymen Almaty qalasyndaǵy HQKO-nyń basshylary oryn aýystyrdy: buryn Almaly aýdandyq HQKO-nyń dırektory qyzmetin atqarǵan A. Ahmetov endi Medeý aýdandyq HQKO-nyń dırektory laýazymyna taǵaıyndalsa, onyń ornyna buryn Bostandyq aýdanynyń HQKO basqarǵan G. Qulmuhamed taǵaıyndaldy. Bostandyq aýdandyq HQKO A.Mamajanova basqaratyn boldy.
Komıtet Tóraǵasy B. Ábishevtiń aıtýynsha: «Búgingi kúni HQKO qyzmetkerleriniń jumysynyń sapasyzdyǵy men qyzmet kórsetýdi usynýshy- ókiletti memlekettik organdardyń ózara qarym-qatynasynyń álsizdigi, sybaılas jemqorlyq faktileriniń kórinis berýi azamattardyń renishin týdyrýda. Osyǵan oraı, Komıtet Memleket basshysynyń sybaılas jemqorlyqqa jol beretin áreketterdi boldyrmaý týraly tapsyrmasyn oryndaý maqsatynda belsendi túrde jumys atqarýda. Qazirgi kúni Komıtet HQKO-nyń basshylary quramynyń jumys sapasymen tanysyp, saraptama júrgizilýde. Saraptama qorytyndysy boıynsha tıisti sheshim qabyldanatyn bolady».
Esterińizge salyp ótemiz, aǵymdaǵy jyldyń 4 mamyrynda Qazaqstan Respýblıkasynyń Baılanys jáne aqparat mınıstri Asqar Jumaǵalıevtiń tóraǵalyǵymen HQKO-nyń basshylarynyń jınalysy bolyp ótti. Kún tártibinde qaralǵan basty máselelerdiń biri-HQKO jumysynda sybaılas jemqorlyqqa jol bermeý. Jınalysta sybaılas jemqorlyqqa qarsy zańnamany júzege asyrý barysyna júrgizilgen monıtorıng qorytyndylary jarııalandy. Monıtorıng statıstıkalyq málimetterge saraptama júrgizý, «Transperensı Qazaqstan» QQ júrgizgen zertteýlerimen jáne bıznes-úderistermen tanysý, jasyryn túrde saýalnama júrgizý jáne Mınıstrdiń blogyna azamattardan kelip túsken shaǵymdar men usynystarǵa saraptama júrgizý nátıjesinde shyǵaryldy. Otyrys sońynda Asqar Jumaǵalıev Komıtetke anyqtalǵan faktiler boıynsha bir aptanyń ishinde qyzmettik tekserýler júrgizip, basshylyqtyń jaýapkershilikteri týraly usynystar berýdi tapsyrǵan bolatyn.
