HQQDB Jastar korpýsy jobasyn damytýǵa 21,7 mln dollar bóledi
ASTANA. QazAqparat - Búgin Senattyń Áleýmettik mádenı damý jáne ǵylym komıtetiniń keńeıtilgen otyrysy bolyp ótti. Onda «Qazaqstan Respýblıkasy men energııa tıimdiligin arttyrý baǵdarlamalaryna jáne jastar korpýsyn damytýǵa arnalǵan bir donordyń Trast qory ákimshisi retinde áreket etýshi Halyqaralyq Qaıta Qurý jáne Damý Banki (HQQDB) arasyndaǵy grant týraly (Jastar korpýsyn damytý jobasy) kelisimdi ratıfıkatsııalaý týraly» zań jobasy talqylandy.
Jastar korpýsy jobasynyń maqsaty - jastardyń, ásirese áleýmettik turǵydan osal toptarynyń qoǵamdyq ómirine tartylýyn yntalandyrý, qoǵamdastyqtyń ıgiligi jolyndaǵy qoǵamdyq paıdaly qyzmet daǵdylaryna oqytý baǵdarlamalary arqyly olardyń ómirlik mańyzdy daǵdylaryn damytý bolyp tabylady. Osyǵan baılanysty Dúnıejúzilik bank Jastar korpýsyn damytý jobasyn qarjylandyrýǵa járdem kórsetý úshin Qazaqstanǵa osy kelisimde jazylǵan nemese aıtylǵan tártippen 21,7 mln dollar mólsherinde grant bóledi. Grant Trast qorynyń qarajatynan qarjylandyrylady, ony tolyqtyrý úshin Dúnıejúzilik Trast qorynyń donorynan kezeńder boıynsha jarnalar alynyp otyrady.
Bilim jáne ǵylym vıtse-mınıstri Tahır Balyqbaevtyń aıtýynsha, qarajat kezeń kezeńimen tartylyp, ol úsh quramdas bólikten turady. Máselen, birinshi kezeńde 18 jáne 29 jas aralyǵyndaǵy jastardyń jobalary qarjylandyrylady. Buǵan 20 mıllıon dollar jumsalady.
Zań jobasy aldaǵy ýaqytta ótetin palatanyń jalpy otyrysyna shyǵarylmaq.
