HQQDB Qazaqstandaǵy Ónimdi ınnovatsııalardy yntalandyrý jobasyna 88 mıllıon dollar bóledi
ASTANA. QazAqparat - Halyqaralyq qaıta qurý jáne damý banki Qazaqstanǵa Ónimdi ınnovatsııalardy yntalandyrý jobasyn qarjylandyrýǵa 88 mıllıon dollar bóledi. Bul týraly búgin Parlament Senaty Áleýmettik-mádenı damý jáne ǵylym komıtetiniń keńeıtilgen otyrysynda málim boldy.
Eske salaıyq, otyrysta «Qazaqstan Respýblıkasy men Halyqaralyq qaıta qurý jáne damý banki arasyndaǵy Qaryz týraly kelisimdi (Ónimdi ınnovatsııalardy yntalandyrý jobasy) ratıfıkatsııalaý týraly» zań jobasy talqylanǵan bolatyn.
Bilim jáne ǵylym vıtse-mınıstri Tahır Balyqbaevtyń aıtýynsha, atalǵan klisimge 2015 jyldyń 9-maýysymynda qol qoıylǵan.
«Bizdiń mınıstrlik Halyqaralyq qaıta qurý jáne damý bankimen birlesip tehnologııalardy kommertsııalandyrý jobasyn júrgizgen bolatyn, sonyń oń tájirıbesin jalǵastyrý maqsatynda osy kelisimge qol qoıyldy. Tehnologııalardy kommertsııalandyrý baǵytynda tańdap alynǵan 65 jobanyń ishinde 40 joba daıyn ónim shyǵarý deńgeıine jetip otyr. Jalpy somasy 900 mln. teńgeden astam ónim satyp, qyzmetter kórsetti. Sondyqtan da halyqaralyq bank jobany odan ári jalǵastyrýǵa nıet bildirip, 2016-2020 jyldary oryndalatyn Ónimdi yntalandyrý jobasyn qarjylandyrýǵa kirispek», - deıdi Tahır Balyqbaev.
Onyń aıtýynsha, Ónimdi ınnovatsııalardy yntalandyrý jobasynyń basty maqsaty - joǵary sapaly ári ózekti zertteýlerdi oryndaý men olardyń nátıjelerin naryqqa shyǵarý. Joba bes bólikten turady.
Tutastaı alǵanda kelisimge sáıkes, Halyqaralyq qaıta qurý jáne damý banki Qazaqstanǵa Ónimdi ınnovatsııalardy yntalandyrý jobasyn qarjylandyrýǵa 88 mıllıon AQSh dollary somasynda qaryz beredi. Atalǵan qaryzdyń óteý merzimi bes jyldyq jeńildik kezeńdi qosa alǵanda 15 jyldy quraıdy. Tólenýge tıisti birjolǵy komıssııa qaryz somasynyń 0,25 paıyzyna teń.
