HQQDB Qazaqstanda medıtsınalyq saqtandyrýdy engizýge kómektesedi

ASTANA. QazAqparat - Halyqaralyq Qaıta Qurý jáne Damý Banki tarapy Qazaqstanǵa áleýmettik medıtsınalyq saqtandyrýdy engizýge kómektesedi. Bul týraly Májilistegi jalpy otyrysta «Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy Qaryz týraly kelisimdi ratıfıkatsııalaý týraly» zań jobasyn tanystyrý barysynda QR Densaýlyq saqtaý mınıstri Eljan Birtanov málim etti, dep habarlaıdy QazAqparat.

«Halyq densaýlyǵyn saqtaý salasyndaǵy basty maqsat - ol mindetti áleýmettik medıtsınalyq saqtandyrýdy engizý. Densaýlyq saqtaýǵa jumsalatyn memlekettik jáne jeke shyǵyndardyń ósýi halyq pen jumys berýshilerdiń yntymaqtastyq jaýapkershiligi ustanymy negizinde densaýlyq saqtaý salasynyń qarjylyq turaqtylyǵyn kúsheıtýdi qajet etedi. Qazaqstan men Halyqaralyq Qaıta Qurý jáne Damý Banki arasyndaǵy qaryz týraly kelisimge 2016 jyly 1 qarashada qol qoıyldy. Qaryz somasy 80 mln AQSh dollaryn quraıdy. Qazaqstan Respýblıkasynyń birlesip qarjylandyrý kólemi 10 mln dollar», - dedi mınıstr.

Jobanyń maqsaty densaýlyq saqtaý qyzmetin kórsetý júıesiniń qoljetimdiligin, sapasyn jáne ekonomıkalyq tıimdiligin arttyrý men densaýlyqqa baılanysty kúrdeli problemalardy týdyratyn qarjylyq táýekelderdi turǵyndar úshin tómendetýge negizdelgen.

Osy rette Qazaqstan Respýblıkasynyń áleýmettik medıtsınalyq saqtandyrýdyń ulttyq júıesin engizýge qoldaý kórsetý; saqtandyrý júıesin engizýge qoldaý kórsetý úshin medıtsınalyq kómek kórsetý júıesin nyǵaıtý; jobany basqarý, monıtorıg jáne baqylaý, kommýnıkatsııalyq strategııa sharalary qamtylyp otyr.