Hıtroý endi Eýropanyń eń tanymal áýejaıy emes
NUR-SULTAN. QazAqparat – London qalasyndaǵy Hıtroý endi Eýropanyń eń tanymal áýejaıy emes. Times gazetiniń dúısenbi kúni jazýynsha, ol Eýropanyń eń tanymal áýejaılary tiziminde 10-shy orynǵa túsken. Pandemııaǵa deıin Hıtroý bul tizimde kósh bastap turǵan edi. Bul týraly QazAqparat TASS agenttigine silteme jasap habarlaıdy.
Bıylǵy jyldyń tamyz aıynda Hıtroýda nebári 19,5 myń reıske qyzmet kórsetilgen. Al Amsterdamdaǵy Shıphol bul kórsetkish boıynsha rekord ornatyp, 33 myń reıske qyzmet etti. Eýropanyń adam eń kóp jınalatyn áýejaıynyń arasynda Antalıa, Afına, Barselona, Madrıd, Maıorka, Ystanbul jáne Frankfýrt, sondaı-aq parıjdik Rýassı - Sharl de Goll áýe aılaqtary de bar.
Hıtroýdaǵy jolaýshylar aǵyny ótken aıda 2,2 mln adamǵa jetken. Bul – 2020 jyldyń kókteminen beri eń joǵary kórsetkish. The Times basylymynyń jazýynsha, Eýropanyń kóptegen áýejaılarynda bul kórsetkish Hıtroýǵa qaraǵanda áldeqaıda jyldam ósip keledi. Burynǵy deńgeıge baıaý oralý sebepteriniń biri – Eýropanyń basqa elderine qaraǵanda shetelden Ulybrıtanııaǵa kirýge talap óte qatań. Áýe aılaǵynyń ákimshiligi el úkimetin olardy jeńildetip, qoldanystaǵy koronavırýs shekteýleriniń bir bóligin, sonyń ishinde elge kirgennen keıin quny qymbat PTR taldaýdy eki ret ótý talabyn alyp tastaýǵa úndep otyr.