Hıtroý áýejaıynda kútip otyrǵan jolaýshylar Almatyǵa qaraı búgin ushyp shyǵa alady - Eır Astana
ASTANA. 21 jeltoqsan. QazAqparat /Gúlnár Jandaǵulova/ - «Eır Astana» áýe kompanııasynyń London-Almaty reısiniń jolaýshylary Qazaqstanǵa búgin ushyp shyǵa alady. Hıtroý áýejaıy jumysyn qalpyna keltirdi. Bul týraly «Eır Astana» kompanııasynyń qoǵammen baılanys jónindegi menedjeri Janna Badaýbaeva habarlady.
«Hıtroý áýejaıynda sapar kútip otyrǵan London-Almaty reısiniń jolaýshylaryna toqtalatyn bolsaq, olar otanymyzǵa búgingi reıspen jetkiziledi. Jaǵdaı jaqsaryp, Hıtroý áýejaıy ashyldy», - dedi J.Badaýbaeva.
Áýe kompanııasynyń qyzmetkeri atap ótkendeı, Almaty-London baǵytyndaǵy jolaýshylar keshe Ulybrıtanııa astanasyna basqa áýe kompanııasy qyzmetiniń kómegimen jetken eken.
18 jeltoqsandaǵy qolaısyz aýa-raıynyń saldarynan Almaty-London baǵytyndaǵy KS 901 reısimen ushqan «Eır Astana» áýe kompanııasynyń ushaǵy Hıtroý halyqaralyq áýejaıyna qona almaı, Gannover qalasyna qonýǵa májbúr boldy. Osy reıstiń 159 jolaýshysy ystyq tamaqpen qamtamasyz etilip, sondaı-aq qonaq úılerge ornalastyrylǵan.
