Hırýrgter oq tıgen almatylyqtyń ómirin saqtap qaldy
ALMATY. QazAqparat – Almatylyq dárigerler aýyr halde aýrýhanaǵa jetkizilgen 18 jastaǵy jigitti aman alyp qaldy, dep habarlaıdy QazAqparat tilshisi.
Almaty qalalyq Qoǵamdyq densaýlyq saqtaý basqarmasynyń málimetinshe, sýyq qarýdan jaraqat alyp, qansyraǵan 18 jastaǵy jigitti Jedel medıtsınalyq járdem brıgadasy shuǵyl túrde №7 qalalyq klınıkalyq aýrýhanasynyń qabyldaý bólimine jetkizdi.
Qabyldaý kezinde naýqastyń jaǵdaıy óte aýyr bolǵan. Jigittiń ishki aǵzasy zaqymdanyp, kóp qan joǵaltqan. Travmatıkalyq shoktyń saldarynan qan qysymy 70-75/35-40 tómendep ketken. Dárigerler shuǵyl túrde ota jasaýǵa aldy.
«Otany qandy toqtatýdan bastadyq. Barlyq zaqymdalǵan tamyrlardan qan ketýdi toqtatqannan keıin monıtorda qan qysymy kóterile bastady. Sodan keıin, ishki aǵzany qaıta qaraýdy jalǵastyrdyq. Uzyndyǵy 50 sm-ge deıin sozylǵan aşy ishektiń zaqymdalǵan aımaǵyn saqtaı almaıtyn bolǵandyqtan, rezektsııa jasadyq. Jińishke ishek pen ishek qarynshalarynyń kóptegen perforatsııalyq jarasyn tiktik. Operatsııadan keıingi kezeńde patsıenttiń ómirine jańa qaýip tónbes úshin jáne qaıta ota jasaý qaýpin boldyrmaý maqsatynda biz bárin eskerdik. Operatsııa sátti aıaqtaldy», - deıdi №7 qalalyq klınıkalyq aýrýhananyń hırýrgi Farabı Stamqulov.
Otadan keıin naýqas, 11 kún boıy aýrýhananyń jansaqtaý bóliminde jatty. Jaqynda ol ambýlatorııalyq em alý úshin aýrýhanadan úıine shyǵaryldy.
