Hımııadan Nobel syılyǵy «evolıýtsııa kúshin meńgergen» ǵalymdarǵa buıyrdy

ASTANA. QazAqparat - Hımııa salasynda 2018 jylǵy Nobel syılyǵyna «fermentterdiń baǵyttalǵan evolıýtsııasy úshin» AQSh ǵalymy Frensıs Arnoldqa, sondaı-aq «peptıdter men antıdenelerdiń beınelenýi úshin» Djordj Smıt (AQSh) pen Gregorı Vınterge (Ulybrıtanııa) berildi. Bul týraly sársenbide Shvetsııa Koroldigi ǵylym akademııasynyń hımııadan Nobel komıteti málim etti, dep jazady TASS.

Nobel komıtetiniń jazýynsha, zertteýshiler «evolıýtsııa kúshin meńgere» alǵan.

«Olar evolıýtsııany baqylaýǵa alyp, ony adamzat múddesine paıdalanǵan», - dep atap ótti ol. Komıtet habarlamasyna sáıkes, «2018 jylǵy Nobel syılyǵynyń laýreattary oılap tapqan ádister qazirgi kezde  ekologııalyq hımııa ónerkásibin alǵa jyljytýda, jańa materıaldardy qurýǵa, turaqty bıootyndy óndirý kezinde, sondaı-aq túrli aýrýlarmen kúresýde qoldanylady.

Frensıs Arnold 1956 jyly Pıtsbýrgte (AQSh) dúnıege kelgen, Kalıfornııa tehnologııalyq ýnıversıtetinde jumys isteıdi. Djordj Smıt 1941 jyly Norýolkta (AQSh) dúnıege keldi, Mıssýrı Ýnıversıtetiniń qurmetti professory. Ser Gregorı Vınter 1951 jyly Ulybrıtanııanyń Lester qalasynda týǵan. Ol Kembrıdjdegi molekýlıarlyq bıologııa zerthanasynda qyzmet etedi.