Hımııa salasyndaǵy Nobel syılyǵy tabystaldy
ASTANA. QazAqparat - 2016 jyldyń hımııa salasyndaǵy Nobel syılyǵy molekýlalyq qozǵalysty sıntezdeıtin joba ázirlegen úsh ǵalymǵa buıyrdy, dep jazady «Habar 24».
Olar: Jan-Per Savaj, Bernard Ferıng jáne Frezer Stoddart.
Ǵalymdardyń alǵashqysy Strasbýrg ýnıversıteti men Frantsııanyń ulttyq ǵylymı zertteý ortalyǵynda eńbek etedi. Al Frezer Stoddart AQSh-taǵy Soltústik-batys ýnıversıtetiniń qyzmetkeri. Al úshinshi ónertapqysh Bernard Ferıng Nıderlandtaǵy Gronıngen ýnıversıtetindegi organıkalyq hımııa salasynyń professory.
Nobel syılyǵyna laıyqtylardy tańdaıtyn komıtettegilerdiń aıtýynsha, úsh laýreat buǵan deıingi ǵalymdardyń oryndalmaı kelgen armanyn júzege asyrǵan. Olar kádimgi avtokólik jáne ózge de mehanızmderdiń molekýlıarly nano úlgisindegi balamasyn jasady. Osynyń kómegimen energııany saqtaıtyn nemese basqa da jańa qurylǵylar oılap tabýǵa bolady.
