Hımııa kásiporyndarynda jasyl tehnologııany engizýdiń arnaıy jospary qabyldanady

ASTANA. KAZINFORM – Úkimet basshysy Oljas Bektenov hımııa kásiporyndarynda qorshaǵan ortany qorǵaý máselelerin kóterip, ekologııalyq talaptardy saqtaý kerektigin basa aıtty. 

— Elimizdiń hımııa salasyndaǵy iri kásiporyndardyń kópshiligi shyǵaryndylardy baqylaý júıesin engizdi. Degenmen qalǵan óndirýshiler zamanaýı ekologııalyq súzgiler men ýtılızatsııalaý tehnologııalaryn áli de paıdalanbaı otyr, — dedi Oljas Bektenov Úkimet otyrysynda.

Osy oraıda Premer-mınıstr birqatar quzyrly organǵa mindetter júktedi.

— Ekologııa jáne tabıǵı resýrstar mınıstrligi, Ónerkásip jáne qurylys mınıstrligi jáne Energetıka mınıstrligimen birge bıyl osyndaı kásiporyndardy túgendeýdi aıaqtap, olardy jańǵyrtý men jasyl tehnologııalardy engizýdiń arnaıy josparyn qabyldaýdy tapsyramyn, — deıdi ol.

Buǵan deıin Úkimet basshysy elimizden hımııa óndirisi shıkizatynyń 45% eksportqa tereń óńdelmeı shyǵarylatyny aıtyp, daıyn ónimdi shyǵarý kerektigin mindettedi. 

Aıta keteıik, elimizde munaı-gaz salasyn damytýdyń jol kartasy aıasynda 3,5 myń turaqty jumys orny ashylady.