«Hımfarm» AQ aldaǵy 3 jylda dári-dármek eksportyn 30 paıyzǵa deıin ulǵaıtpaq
ALMATY. 4 sáýir. QazAqparat - Qarasha aıynda Shymkent qalasyndaǵy «Hımfarm» AQ-nyń zaýytynda jańa ampýldyq-ınfýzııalyq tsehtyń qurylysy aıaqtalady.
Bul týraly kompanııanyń bas dırektory Vlodzımırz Grygleıch keshe Almatyda GMP halyqaralyq sapa standarty týraly buqaralyq aqparat quraldary ókilderine arnalǵan aqparattyq-bilim berý semınarynda aıtty.
Polshanyń Santo Member of Polpharma Group farmatsevtıkalyq kompanııasyna qarasty óndiris ornynda GMP halyqaralyq sapa standarty boıynsha jumys isteýi tıis bul tseh iske qosylǵan kezde ampýlalar óndirý kólemi 35-50 mln.-ǵa deıin ulǵaıatyn bolady. Sondaı-aq zaýyt qazirgi tańda 32 ataýly dári-dármek túrin shyǵaryp jatsa, ol 90-nan aspaq.
Búgingi tańda óndirgen ónimderiniń 10 paıyzyn Ázirbaıjan, Qyrǵyzstan, Ózbekstan, Túrkimenstan sııaqty kórshiles shet elderge eksporttap jatqan kompanııa aldaǵy 3 jylda ony eń keminde 30 paıyzǵa deıin jetkizýdi josparlap otyr.
