Hılları Klınton resmı túrde saıasatqa oraldy
ASTANA. QazAqparat - Demokratııalyq partııanyń atynan AQSh prezıdenttiginen úmitker Hılları Klınton saılaý naýqany kezinde kótergen bastamalaryn qoldaý maqsatynda jańa saıası uıym quratynyn málimdedi. Mundaı málimdemeni Klınton dúısenbi kúni Twitter-degi paraqshasynda jarııalady, dep habarlaıdy TASS.
Onyń jańa uıymy Onward Together (Birge tek alǵa) dep atalady.
«Onward Together uıymyn adamdardyń jigerlenip, saıası úrdisterge qatysýyna jaǵdaı jasaý maqsatynda, sondaı-aq óz áreketterin úılestirip, tipti saılaýda óz úmitkerligin usynýlary úshin iske qosyp jatyrmyz», - dep jazdy Klınton.
Onward Together resmı saıtynda onyń maqsaty - saılaýda Klıntonǵa daýys berip, qoldaý kórsetken 66 mln adamnyń ıdeıasyn alǵa tartý, sondaı-aq jalpy «údemeli qundylyqtardy» qoldaý ekendigi jazylǵan. Burynǵy memleket hatshysynyń saılaý naýqany Stronger Together uranymen ótken bolatyn. Fox News telearnasynyń baǵalaýynsha, jańa uıymdy qurý degenimiz «Klıntonnyń resmı túrde saıasatqa oralýyn» bildiredi.
