HII DSU Mınıstrlik konferentsııasy 2020 jyldyń maýsymynda Astanada ótedi
ASTANA. QazAqparat - Dúnıejúzilik saýda uıymy Bas keńesiniń otyrysynda Uıymǵa múshe elder biraýyzdan 2020 jyldyń maýsymda Astanadaǵy 12-DSU Mınıstrlik konferentsııasyn (Uıymnyń eń joǵarǵy organy) ótkizýge daýys berdi, dep habarlaıdy «QazAqparat» HAA Ulttyq ekonomıka mınıstrliginiń saıtyna silteme jasap.
Bul sheshim DSU-ǵa múshe elderdiń Prezıdent Nursultan Nazarbaevtyń basshylyǵymen ekonomıkalyq reformalar men lıberaldy saýda saıasatyna senimin bildiredi.
Jenevadaǵy Qazaqstannyń BUU-ǵy bólimshesindegi Turaqty ókili, elshi Janar Aıtjanova, jaqynda DSU-ǵa qosylǵan jas táýelsiz memleket úshin osyndaı mańyzdy kezdesýdi ótkizýdiń úlken qurmet ekenin atap ótti. Qazaqstan DSU-nyń kún tártibindegi barlyq sheshilmegen máselelerdi talqylaýǵa Mınıstrler konferentsııasynyń negizgi nátıjelerin qamtamasyz etý úshin konstrýktıvti úles qosýǵa daıyn.
DSU-nyń Bas dırektory Roberto Azevedo QR Prezıdentine jáne Úkimetine mınıstrlik konferentsııasyn ótkizýge daıyn bolǵany úshin alǵysyn bildirip, bul qadam eldiń kópjaqty saýda júıesiniń qundylyqtary men qaǵıdalaryn ustanatyndyǵyn rastaý bolyp tabylatynyn atap ótti.
Mınıstrlik konferentsııasy DSU-nyń joǵary basqarýshy organy bolyp tabylady, onyń otyrysy eki jylda bir ret ótkiziledi. Ýákiletti organnyń ókilettikteri kópjaqty saýda kelisimderi sheńberinde barlyq máseleler boıynsha, sonyń ishinde halyqaralyq saýdany retteıtin jańa tártipterdi bekitý týraly sheshim qabyldaý quqyǵyna ıe.
Atap ótken jón, 2017 jyly 11 jeltoqsanda Býenos-Aıres qalasynda ótken DSU-nyń 11-shi Mınıstrlik konferentsııasy qorytyndysy boıynsha, búgingi tańda elektrondyq kommertsııa (elektrondyq saýda-sattyq qatysýshylary úshin úılestirilgen retteýshi ortany qalyptastyrýdy qamtamasyz etý); qatysýshy memleketterde turaqty, ashyq jáne boljamdy ınvestıtsııalyq qyzmet jaǵdaıyn qalyptastyrýǵa baǵyttalǵan kóp jaqty erejelerdi anyqtaý; mıkro, shaǵyn jáne orta kásiporyndardy (MShOK) halyqaralyq saýdaǵa yqpaldasýyna yqpal ete alatyn kóldeneń dıskrımınatsııasyz sharalardy aıqyndaý; yqtımal shekteýler men lıtsenzııalaý, biliktilik talaptaryna jáne tehnıkalyq standarttarǵa baılanysty qosymsha shyǵyndardy qyzmet kórsetý sektorynda kompanııalar úshin azaıtý salalaryndaǵy retteý erejelerin aıqyndaý máseleleri pysyqtalýda.
12-shi DSU Mınıstrlik konferentsııasynda DSU-nyń 164 múshesiniń saýda mınıstrleri jáne 20 baqylaýshy eldiń ókilderi keledi jáne qatysýshylardyń jalpy sany tórt myńnan asady dep kútilýde.
