«HІH-HH ǵasyrlardaǵy qazaqtar arasynda aǵash pen súıekti kórkem óńdeý» kitaby jaryq kórdi

NUR-SULTAN. QazAqparat – Belgili etnograf, tarıh ǵylymdarynyń doktory Shaızada Toqtabaevanyń «HІH-HH ǵasyrlardaǵy qazaqtar arasynda aǵash pen súıekti kórkem óńdeý» atty kitaby jaryq kórdi, dep habarlaıdy QazAqparat tilshisi.

QR BǴM Ǵylym komıteti Sh.Ýálıhanov atyndaǵy Tarıh jáne etnologııa ınstıtýtynda qamqorshylar keńesiniń jáne «Tugurul Han – On Han» korporatıvtik qorynyń qoldaýymen jaryq kórgen kitap qolónerdiń mańyzdy túrine jatatyn HІH-HH ǵasyrlardaǵy qazaq halqynyń aǵash buıymdarynyń genezısin, kórkemdik-beınelik jáne maǵynalyq mánin ashýǵa arnalǵan.

Atap aıtqanda, kitapta qazaqtyń aǵash pen súıekti óńdeý materıaldary, quraldary, tehnıkasy sıpattalǵan.

Halyq shyǵarmashylyǵynyń osy túrinen tabylǵan jańa qyrlar men reńkter burynǵy ótken talantty sheberlerdiń ujymdyq eńbekterin tarıhı-mádenı mańyzyn jańasha túsinýge múmkindik beredi.

Kitap-albom tek gýmanıtarlyq sala mamandary úshin ǵana emes, sonymen qatar óz halqynyń shyǵarmashylyq murasyna beı-jaı qaramaıtyn oqyrman úshin qyzyqty bolady.