Hıdjamaǵa ruqsat berý nemese shekteý máselesi talqylanyp jatyr – mınıstr
«Atyraýdaǵy ortalyq tekserilip, ondaǵy sanıtarlyq-epıdemıologııalyq buzýshylyq bolǵandyqtan, ortalyqty jabý rásimdelip jatyr. Bul «em» – medıtsınalyq ruqsat etilgen qyzmetke jatpaıdy, sondyqtan qazir zań júzinde oǵan ruqsat etý kerek pe, joq pa, arnaıy jumys toby qurylyp, dástúrli medıtsınamen aınalysatyn mamandarmen birge talqylanyp jatyr», - dedi Densaýlyq saqtaý mınıstri Ajar Ǵınııat Úkimet kýlýarynda tilshilerge bergen suhbatynda.
Sonymen birge, Atyraýdaǵy oqıǵadan keıin dárigerlerge halyqtyń arasynda túsindirý jumystaryn júrgizýge tapsyrma berilgen.
«Hıdjama jasaıtyn oryndar jeke medıtsınalyq ortalyq bolyp sanalady. Barlyq jeke medıtsınalyq ortalyqtardy tekserý úshin basa-kóktep kire almaımyz, buzýshylyq týraly aryz bolǵanda ǵana zań boıynsha prokýratýramen birigip, teksere alamyz», - dep túsindirdi mınıstr.
Eske sala ketsek, Atyraýda náresteni hıdjama tásili arqyly emdep jatqan vıdeo taraǵan edi.
