Hıdjab taqyrybyn saıasılandyrý dinniń ózine qaýipti - mınıstr
«Birinshi kezekte jalpy zaıyrlylyq ustanymyn basa aıtqan jón. Sebebi, bizdiń Ata Zańymyz bar, belgili zańdar bar. Sondyqtan, zaıyrlylyq prıntsıpi – elimizdiń basty ustanymy. Ekinshiden, keıbir qoǵamdyq pikir qalyptastyrýshylar manıpýlıatsııaǵa ıtermeleıtin sııaqty. Mysaly, keıbir jeli qoldanýshylary «halyqaralyq tájirıbede, álemde bul másele sheshimin tapqan» dep úzildi-kesildi jazǵan eken. Menińshe, bul - feık aqparat. Sebebi damyǵan, zaıyrly, demokratııalyq Frantsııa, Aýstrııa sııaqty elder jasyna baılanysty hıdjabqa shekteý qoıǵan. Árıne, ruqsat etetin elder de bar. Sondyqtan, biz buǵan baılanysty halyqaralyq tájirıbeniń ártúrli ekenin kóremiz. Ár túrli memlekettiń ózine saı ustanǵan baǵyty bar, tájirıbesi bar. Bizdiń de ózindik ustanym-baǵytymyz bar. Ol - zaıyrlylyqqa jáne Ata Zańǵa baǵyný», - dedi mınıstr YouTube platformasyndaǵy «Ózekti» jobasynda.
D. Qydyráli Bilim týraly zańda da mektep formasy naqty bekitilgenin eske saldy. Jaqynda Oqý-aǵartý mınıstri Ǵanı Beısembaev óz pikirin aıtqan edi.
«Taǵy bir aıta keterlik jaǵdaı, biz dinı senim bostandyǵyna da qurmetpen qaraımyz, memlekette oǵan barlyq jaǵdaı jasalǵan. Aıtalyq, din isteri basqarmalaryna qarasty medrese-kolledjder bar, solarda qyz balalardyń bilim alýyna jaǵdaı jasalǵan. Sonymen qatar, bul máselege dástúr turǵysynan da qaraıtyndar bar. Bilim berý mekemeleriniń basty maqsaty – oqytý, balaǵa bilim berý. Qurannyń da alǵashqy ámiri «Oqy» dep bastalatynyn bilemiz. Eń bastysy, bul taqyrypty saıasılandyrmaý kerek. Sebebi, saıasılaný, radıkaldaný eń áýeli dinniń ózine qanshalyqty qaýipti ekenin biz Taıaý Shyǵystan nemese tóńirektegi elderden jaqsy bilemiz», - dedi Darhan Qydyráli.