Hıddınkke Túrkııa men Qytaı quramalary «quda túsip otyr»
ASTANA. Aqpannyń 3-i. QazAqparat - Seısenbi kúni Túriktiń LIGTV telearnasy Gýs Hıddınktiń kelesi dúısenbi, aqpannyń 8-inen bastap eldiń ulttyq komandasynyń jańa bas jattyqtyrýshysy bolatynyn habarlady.
Telearnanyń aqparaty boıynsha, sol kúni gollandyq maman kelisimshartqa qol qoıý úshin Túrkııaǵa kelýi kerek. Túrik fýtbol federatsııasy bul aqparatty qýattaǵan da, teriske de shyǵarǵan joq, dep jazady reseılik "Sport-ekspress" basylymy.
Al, Sports.ru basylymy Hıddınktiń óz mansabyn Qytaıda jalǵastyrýy múmkin ekenin habarlap otyr. Ázirge Reseı quramasynyń bas jattyqtyrýshysy bolyp tabylatyn Hıddınk Qytaı tarapynan usynys alypty. Oǵan qandaı qyzmet beriletindigi týraly habarlanbaı otyr.
Esterińizge sala keteıik, Hıddınk Reseıge aǵymdaǵy aptada kelýge ýáde bergen, sebebi búgin, aqpannyń 3-i kúni Reseıdiń Fýtbol odaǵynyń jańa prezıdenti saılanady. Al aqpannyń 7-sinde Hıddınk reseılik delegatsııa quramymen Varshavada ótetin Eýro-2012 irikteý týrnıriniń jerebe tastaý rásimine qatysady.
