HHV Búkilálemdik qysqy ýnıversıada oıyndarynda Qazaqstan namysyn 42 sportshy qorǵaıdy
ALMATY. 5 qańtar. QazAqparat /Erlik Erjanuly/ - 27 qańtar men 6 aqpan aralyǵynda Túrkııanyń Erzýrým qalasynda HHV Búkilálemdik qysqy ýnıversıada oıyndary ótedi. Olımpıada oıyndarynan keıingi eń mártebeli sport dodasy sanalatyn bul baıraqty básekege bıyl álemniń 57 elinen 3 myńnan astam sportshy qatyspaq.
"Eki jylda bir ret ótetin bul dúbirli dodaǵa Qazaqstan quramasy sporttyń - mánerlep syrǵanaý, snoýbord, shańǵy jarysy, frıstaıl men hokkeı (erler komandasy) sııaqty túrleri boıynsha qatysady. Delegatsııa quramyndaǵy 59 adamnyń 42-si sportshylar bolmaq. Ózgeleri bapkerler, dárigerler",-deıdi QR Stýdentter sporty federatsııasynyń Bas hatshysy Jasnur Aqedil.
Onyń aıtýynsha, VII qysqy Azııa oıyndarymen tuspa-tus kelýine baılanysty Búkilemdik qysqy ýnıversıada oıyndaryna Qazaqstan quramasynyń úzdikteri qatysa almaıdy. Jalpy, stýdentter arasyndaǵy bul ýnıversıadaǵa 18 ben 28 jas aralyǵyndaǵy sportshylar ǵana qatysa alady. Onda bapkerler mánerlep syrǵanaýdan Ádil Jarbolov, shańǵy jarysynan Evgenıı Koshevoı, frıstaıldan Darıa Rybalovaǵa zor úmit artyp otyr.
Buǵan deıin 2009 jyly aqpannyń 18-i men 28-i aralyǵynda Qytaıdyń Harbın qalasynda ótken XXIV qysqy ýnıversıada oıyndarynda qazaqstandyqtar sporttyń 5 túri boıynsha synǵa túsken edi. Onda otandastarymyzdan Valerıı Krıchenko baptaıtyn hokkeıshi jigitter tórtinshi oryndy qanaǵat tutty. Mundaı nátıjege Nıkolaı Ýlıtın jattyqtyratyn konkımen júgirýshiler arasynda Denıs Kýzın de ıe boldy. Al shańǵyshy qyzdar úzdik bestikti túıindedi. Onda komandalyq esepte birinshi oryndy 34 medal ıelengen Qytaı quramasy aldy. Odan keıingi oryndardy Reseı (21 medal), Koreıa (7 medal), Japonııa (10 medal) men Shveıtsarııa (5 medal) sportshylary bólisti.
