HHІ ǵasyrdyń 21-shi jyly barsha adamzat úshin betburys kezeńine aınalmaq

NUR-SULTAN. QazAqparat - 21-ǵasyrdyń 21-shi jyly barsha adamzat úshin betburys kezeńine aınalmaq. Bul týraly 7-shi shaqyrylǵan Parlamenttiń 1-shi sessııasyn ashqan QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Májilis pen barlyq deńgeıdegi máslıhattardyń kóppartııaly bolýy, jańa quramy qoǵamdaǵy saıası básekeniń arta túskendigin kórsetti. Elbasy jetekshilik etetin «Nur Otan» partııasy óziniń kóshbasshylyǵyn taǵy bir márte dáleldedi. Halyqtyń belgili bir bóliginiń múddesin kózdeıtin basqa da partııalar senim mandatyna ıe boldy. El-jurtymyz egemendigimizdiń 4-shi onjyldyǵyna qadam basar tusta buryn bolmaǵan jańa syn-qaterlermen betpe-bet kelip otyr. Biz ǵana emes kúlli dúnıejúzi múlde jańa dáýirge bet burdy. Órkenıettiń damý jolymen álemdik qurylymnyń túp negizi túbegeıli ózgeriske ushyraýda», - dedi Memleket basshysy.

QR Prezıdenti alda synaqtar men syn-qaterler az bolmaıtynyn basa aıtty.

«Degenmen, barlyǵymyzdyń eń basty mindetimiz - pandemııanyń saldaryn eńserý. 21-ǵasyrdyń 21-shi jyly barsha adamzat úshin betburys kezeńine aınalmaq. Bul jyl aldaǵy onjyldyqtyń basty baǵdaryn aıqyndaıdy. Mundaı kúrdeli jaǵdaıda ýaqyttan utylýǵa jáne bir sátke de bosańsýǵa bolmaıdy», - dedi Qasym-Jomart Toqaev.