HHІ ǵasyrda jyldamdyq órkenıet damýynyń qýatty qozǵaltqyshyna aınaldy - Nazarbaev
ASTANA. QazAqparat - HHІ ǵasyrda jyldamdyq órkenıet damýynyń qýatty qozǵaltqyshyna aınaldy.
Bul týraly búgin «Astana» klýbynyń ekinshi otyrysynda Qazaqstan Prezıdenti Nursultan Nazarbaev aıtty, dep habarlaıdy QazAqparat.
«Búgingi adamzat balasy taǵdyrsheshti dáýirdi bastan keshýde. HHІ ǵasyrda jyldamdyq órkenıet damýynyń qýatty qozǵaltqyshyna aınalǵan. Kóptegen jalpyálemdik jáne óńirlik protsester keremet joǵary dınamıkaǵa ıe bolyp otyr. Indýstrıaldy qoǵamnyń bir mezette postındýstrıaldy, al aqparattyq postaqparattyqqa aınalǵanyn eshkim de baıqamaı qaldy», - dep atap ótti Memleket basshysy.
Osy rette Qazaqstan Prezıdenti álem uly ǵylymı jańalyqtardyń jańa dáýiri tabaldyryǵynda turǵanyn basa aıtty.
«Búginde taıaý on jyldyqta qorshaǵan álem men qoǵam ómiri qanshalyq túbegeıli ózgeriske ushyraıtyndyǵyn boljaýǵa ǵana bolady. Informatıkanyń damýynyń arqasynda jahandyq keńistik vırtýaldy jelimen barynsha myǵym jalǵana túsýde. Bul ulttyq, óńirlik jáne jahandyq damý máselelerinde jańa ádisterdi talap etetindigi sózsiz. Dál osy jaıtqa aıryqsha nazar aýdarýdy talap etetin baıypty syn-qaterler negizdelip otyr», - dedi Nazarbaev.
Aıta keteıik, halyqaralyq deńgeıdegi sharaǵa álemniń 50-den astam sarapshysy, saıası jáne qoǵam qaıratkerleri, 21 eldiń ǵalymdary, sonymen birge jetekshi qazaqstandyq sarapshylar qatysýda.
«Astana» klýby QR Tuńǵysh Prezıdenti - Elbasy qorynyń jetekshi halyqaralyq ǵylymı ortalyqtar - Qytaı qazirgi zamanǵy halyqaralyq qatynastar akademııasy, Germanııa syrtqy saıasat keńesi, Reseı halyqaralyq ister keńesi jáne Halyqaralyq beıbitshilik úshin Karnegı qorymen birlesip qurǵan halyqaralyq pikirtalas alańy sanalady.
«Astana» klýbynyń birinshi otyrysy 2015 jylǵy qarashada álemniń 15 elinen kelgen 47 sarapshynyń qatysýymen ótken edi. Onyń barysynda Eýrazııa geoekonomıkasynyń negizgi aspektileri, ǵalamdyq jáne óńirlik oıynshylardyń múddeleri, ekonomıkalyq qaýip-qaterler men múmkindikter talqylanǵan bolatyn.
