HH SESSIıA QARSAŃYNDA: Elimizdiń qoǵamdyq-saıası ómirinde óz ornymyzdy tabýǵa Qazaqstan halqy Assambleıasy kómektesti - «Arıana» aýǵan ortalyǵynyń basshysy, QHA múshesi V.Ahmadýlla
Onyń aıtýynsha, aýǵandyqtar dıasporasy Qazaqstanda 80 jyldardyń basynan qalyptasa bastady. Sol kezderde Aýǵanstannan alǵashqy stýdentter Qazaqstanǵa kele bastaǵan edi. Al Aýǵanstandaǵy keńes úkimeti qulatylǵannan keıin qonaqjaı ári tynysh el - Qazaqstanǵa aýǵandyqtar tipten aǵyla tústi.
«Sol kezderde aýǵandyqtar týraly jańsaq pikir kóp edi. Bireýler aýǵandyqtar shetinen jaýyz dedi, endi biri Aýǵanstandy kóknárdiń otany atandyrdy, taǵy sol sııaqty mysaldar jeterlik. Bir sózben aıtqanda, osynda Aýǵanstannyń elshiligi ashylyp, birneshe mádenı ortalyqtary paıda bolǵan kezdiń ózinde teris kózqaras az bolmady. Árıne, sol elshilik pen ortalyqtar shama-sharqynda bul seńniń kóbesin sógýge tyrysty, alaıda onyń paıdasy shamaly edi. Sondyqtan, men 1990 jyldary Qazaqstanǵa kelisimen negizgi jumysyma qaramastan, birden solardyń jumysyna qoıan-qoltyq aralasyp kettim. Sol jyldarda men BUU-nyń bosqyndar isi jónindegi Joǵary komıssary Basqarmasynyń áriptesi qyzmetin atqaryp júr edim jáne kóptegen memlekettik mekemelermen, halyqaralyq ÚEU-men baılanysta boldym», - dep ótkendi eske alady aýǵan ortalyǵynyń basshysy.
BUU-nyń bosqyndar isi jónindegi Joǵary komıssary Basqarmasy áriptesteriniń biri belgili qazaqstandyq qoǵam qaıratkeri, qazirgi QR Parlamenti Májilisiniń depýtaty Ahmed Muradov edi. «Dál sol kisi meni QHA-nyń qyzmetimen tanystyrdy. Men ózim qurǵan qoǵamdyq birlestikti tirkep, osynaý ǵajaıyp uıymnyń múshesi atandym», - dep atap ótti V.Ahmadýlla. Onyń aıtýynsha, QHA-daǵy múshelik aýǵandyqtardyń ómirin jańa otandarynda jandandyra túsýge kómektesti. «Arıana» aýǵan etnomádenı ortalyǵy respýblıkalyq jáne qalalyq kólemde uıymdastyrylǵan barlyq sharalarǵa qatysa bastady. Ortalyq ókilderi Aýǵanstannyń mádenıetin, salt-dástúrin, mýzykasyn jáne basqa da qundylyqtaryn búkil Qazaqstan halqyna pash ete bastady. Tipti halyqaralyq festıvaldar men konkýrstarǵa qatysyp, júldeli oryndardy enshiledi.
«Máselen, QHA uıymdastyrǵan memlekettik til bilimi boıynsha ótken konkýrsta meniń otandasym Gýlıam Mahbýb 26 etnos ókilderi qatysqan saıysta gran-prıdi jeńip aldy. Bir tańǵalarlyǵy, ol Qazaqstanǵa kelgende bir aýyz qazaqsha bilmeıtin. Al Ál-Farabı atyndaǵy QazUÝ-niń 2-kýrs stýdenti Ahmadvalı Ahmadııardyń qazaq tilin 2-aq jylda óte jaqsy meńgerip alǵandyǵy sonsha, tipti ol qazir túrli alqaly jıyndarda aýǵan tilinen qazaq tiline, orysshadan qazaqshaǵa jáne kerisinshe de ilespe aýdarmalar jasap júr. Ol QHA-nyń jastar qanaty uıymdastyratyn kóptegen sharalarǵa belsene aralasyp júr», - dep maqtanyshpen atap ótti V.Ahmadýlla.
Ol basqaratyn ortalyq aýǵan halqynyń salt-dástúrin, mádenıetin jan-jaqty kórsetetin halyqaralyq konferentsııalar, «dóńgelek ústelder» jáne basqa da sharalardy úzbeı uıymdastyryp kele jatyr. Eki el arasyndaǵy áriptestik pen eki halyq arasyndaǵy rııasyz dostyqtyń odan saıyn bekı túsýine sporttyń da tıgizip otyrǵan áseri zor. «Sońǵy jyldary Qazaqstanda ótip jatqan kóptegen sport jarystaryna aýǵanstandyq sportshylar da atsalysýda. Máselen, ótken jyly arasynda bir qyz bar aýǵandyq bir top sportshy Qazaqstanǵa kelip, aýyr atletıkadan bolǵan saıysta 7 altyn, 5 kúmis, 3 qola medal enshilep ketti», - dep atap ótti «Arıana» ortalyǵynyń jetekshisi.
«Mundaı mysaldardy kóptep keltirýge bolady. Toq eteri, eldiń qoǵamdyq-saıası ómirinde óz ornymyzdy taýyp, tolyqqandy azamaty bolýymyzǵa Memleket basshysy Nursultan Nazarbaevtyń bastamasymen qurylǵan Qazaqstan halqy Assambleıasynyń tıgizgen kómegi orasan zor», - dep basa aıtty V.Ahmadýlla.
Onyń aıtýynsha, QHA qurylǵannan beri damýdyń dańǵyl jolyna túsip, úlken tájirıbe men ıntellektýaldyq áleýet jınaı otyryp, naǵyz halyqtyq dıplomatııa ınstıtýtyna aınala bildi. Osynaý biregeı ınstıtýt 100-den astam ulysty sútteı uıytyp, respýblıkanyń yrǵaqty damýyna óz úlesin qosyp otyr. Assambleıanyń qyzmeti arqasynda elimizde etnosaralyq jáne konfessııaaralyq kelisimniń biregeı úlgisi qalyptasyp, Konstıtýtsııa boıynsha elimizdiń kez kelgen azamatynyń tiline, dinine, ultyna qaramastan beriletin teńdik quqyǵy is júzinde oıdaǵydaı oryndalyp otyr. «Ár sessııadan keıin Qazaqstan halqy Assambleıasynyń mańyzy artyp keledi. Sondyqtan men osyndaı uly úderistiń kýágeri ári qatysýshysy bolǵanyma baqyttymyn!», - dedi QHA múshesi.
