HH ǵasyrdyń basynda qazaq halqy azattyq jolyna túsip, jer júzinde óziniń orny bar ult ekendigin kórsetti - M. Qoıkeldi
ALMATY. Aqpannyń 22-i. QazAqparat /Ádilet Musahaev/ - Jaryq kórip otyrǵan bul kitapta Alash qaıratkerleriniń ústinen júrgizilgen sot úderisine baılanysty materıaldar jınaǵy bar. Á.Bókeıhannyń 7 tomdyq kitabynyń tusaýkeser rásiminde tarıh ǵylymdarynyń doktory M. Qoıkeldi osylaı aıtty,
dep habarlaıdy QazAqparat.
M. Qoıkeldiniń sózine qaraǵanda, Alash qozǵalysy 1920-1930 jyldarmen aıaqtalmaı, Alash ıdeıasy keıin de jalǵasqan. «Máselen, 1950 jyldyń basynda Qazaqstan boıynsha repressııalar tolqyny júrip ótti. Bul kezde qýǵyn-súrginge ushyraǵandar shyǵarmashylyq adamdary bolatyn. Olarǵa da Alash ıdeıasyn jalǵastyrdyń degen aıyp taǵylǵan. Al Bókeıhannyń 7 tomdyǵy keremet jańalyq, degenmen onyń jalǵasy bolýy tıis. HH ǵasyrdyń basyndaǵy ult-azattyq kóterilisi, Alash qozǵalysy, repressııaǵa baılanysty materıaldar jaryq kórse, biz HH ǵasyrdaǵy qazaq halqynyń basynan ótken zobalańdy tereń, aýqymdy, tolyq túsinýge múmkindik alamyz», dedi ol.
Sondaı-aq ol kezinde bizdi ult, mádenıet retinde sóndirý jumystary júrgizilgendigin aıtady. «HH ǵasyrdyń basynda qazaq halqy azattyq jolǵa túsip, jer júzinde óziniń orny bar ult ekendigin kórsetti. Mine osy joldy, kúresti bastaǵan alyptar shoǵyry boldy, qazaq ultynyń jańǵyrý úrdisiniń shoǵyryn bastaýshysy, Alash avtonomııasyn jarııalap, Alashorda úkimetin quryp, osy memlekettiń jańǵyrýyna úlesin qosqan biregeı tulǵa - Áleıhan Bókeıhan boldy. Á.Bókeıhannyń orny lıder retinde erekshe. Biz egerde HH ǵasyrdyń basyndaǵy qazaq ult-azattyq qozǵalysyn bilgimiz kelse, tanyǵymyz, moıyndaǵymyz kelse, sol arqyly ózimizdiń kóshimizdi túzegimiz kelse, onda eń aldymen Bókeıhanovty túsinýimiz kerek. Biz sol arqyly ult-azattyq kúresti túsinemiz. Biz ókinishke oraı, HH ǵasyrdyń basyndaǵy qazaq halqynyń tarıhyn tolyq túsingen joqpyz, tolyq qorytyp, boıymyzǵa sińire alǵan joqpyz. Bizde tarıh jazylmaı jatyr dep kóp aıtady, onyń bári beker sóz. Tarıh jazylyp jatyr, ony qorytý úrdisi júrip jatyr», dedi M. Qoıkeldi óz sózinde.
