HH ǵasyr mádenıet, ádebıet pen ǵylym úshin ári asa zor jetistikterimen, ári úlken qasiretimen erekshelenedi - Seıit Qasqabasov
ALMATY. 27 qyrkúıek. QazAqparat /Erlik Erjanuly/ - Ótken zamannyń tabystarynyń biri - 1934 jyly KSRO Ǵylym akademııasynyń Qazaq fılıalynyń qurylýy. Sol kúnnen Qazaq fılıalynyń ádebıet jáne folklor sektory óz jumysyn bastady. Bul týraly búgin Almatyda ótip jatqan "Qazirgi ádebıettaný, ónertaný jáne folklortanýdyń ózekti máseleleri" dep atalatyn halyqaralyq ǵylymı-teorııalyq konferentsııada aıtyldy.
"1946 jyly Qazaq KSR ǴA qurylǵanda Til jáne ádebıet ınstıtýty óz aldyna jeke otaý tigip, qazaqtyń tili men ádebıetin keńirek zerteýge bet burdy. 1961 jyly Qanysh Sátbaev, Muhtar Áýezov, Іsmet Keńesbaev syndy Odaqqa tanymal ǵalymdardyń bastamasymen Til jáne óner ınstıtýty ekige bólinip, Ádebıet jáne óner ınstıtýty ashyldy", - deıdi M.Áýezov atyndaǵy Ádebıet jáne óner ınstıtýtynyń dırektory, QR UǴA Akademıgi, fılologııa ǵylymynyń doktory Seıit Qasqabasov.
Ǵalymnyń aıtýynsha, táýelsizdik jyldaryndaǵy ınstıtýt ǵalymdarynyń qol jetkizgen tabystaryn óz ishinen ekige bólip sóz etýge bolady. Táýelsizdiktiń alǵashqy onjyldyǵynda ádebıettiń aqtańdaq betteri men keńestik dáýir tusynda birjaqty baǵalanǵan rýhanı muralar jańasha kózqaraspen zerttele bastady. 2002-2004 jyldary jańa taqyryptardy zertteıtin bólimder ashyldy. Onda álem ádebıeti jáne halyqaralyq baılanys, ejelgi jáne orta ǵasyr ádebıeti, abaıtaný jáne jańa ádebıet, teatrtaný, ónertaný, táýelsizdik dáýirdegi ádebıet máseleleri zerttele bastady. Qoljazba jáne tekstologııa, ádebıet teorııasy jáne ádistemesi, mýzykataný, "M.Áýezov" úıi ǵylymı-mádenı ortalyǵy jumys istedi. Qazirgi tańda ǵylymı zertteý jumystary folklortaný, ádebıettaný, ónertaný ǵylymdary boıynsha júrgizilýde.
