HHІ ǵasyrdyń birinshi shıregin abyroımen aıaqtadyq — Prezıdent
ASTANA. KAZINFORM — Qazaqstandyqtardy Jańa jylmen quttyqtaǵan Memleket basshysy Qasym-Jomart Toqaev elimizdiń bıylǵy jetistikterin atady.
— Jurtymyz Jańa jyldy erekshe kóńil-kúımen kútedi. Ár adam osy sátte arman-tilegin aıtady. Eski jyldyń eń áserli sátterin eske alady. Bolashaqqa jospar quryp, zor úmit artady. 2025 jyl halqymyz úshin mereıli jyl boldy. Elimiz damýdyń dańǵyl jolyna tústi. Álemdegi ahýal kúrdeli bolsa da, ekonomıkamyz órkendep, ishki jalpy ónim 6 paıyzdan asty. Qazaqstannyń altyn-valıýta qory 62 mıllıard dollardan asty. Elge aýqymdy ınvestıtsııa tartyp, birqatar iri jobany júzege asyrdyq. «Dostyq — Moıynty» temirjolynyń ekinshi jelisi iske qosyldy. Bul — Táýelsizdik kezeńindegi eń iri temirjol qurylysy. Sondaı-aq, on úsh myń shaqyrym avtokólik joly salynyp, jóndelip jatyr. Sonyń arqasynda Qazaqstannyń tranzıttik áleýeti arta tústi, — dedi Prezıdent.
Memleket basshysynyń atap ótýinshe, dıqandarymyz ekinshi jyl qatarynan mol ónim alyp, qambany astyqqa toltyrdy. Aýyldy jáne aýyl sharýashylyǵyn damytýǵa basa mán berilip jatyr. Sharýalarǵa buryn-sońdy bolmaǵan qarjylaı qoldaý kórsetildi, ıaǵnı 1 trıllıon teńge osy maqsatqa jumsaldy. Bıyl jalpy aýmaǵy 19 mıllıon sharshy metrden astam turǵyn úı salyndy. Myńdaǵan otbasy baspanaly boldy. Áleýmettik salada kóp sharýa jasaldy. Júzden astam mektep, eki júzge jýyq densaýlyq saqtaý nysany boı kóterdi. Álemniń úzdik joǵary oqý oryndarynyń fılıaldary ashyldy.
— Adam quqyqtaryn qorǵaýǵa basa mán berilip jatyr. Qoǵamda «Zań men Tártip» qaǵıdaty ornyǵa tústi, azamattarymyzdyń quqyqtyq sana-sezimi kúsheıýde. Biz ár jetistikke jurtymyzdyń eren eńbeginiń arqasynda jettik. Azamattarymyz bilim, ǵylym, mádenıet salalarynda bıik belesterdi baǵyndyrdy. Olar halqymyzdy rýhy asqaq, zııatker ult retinde tanytýǵa zor úles qosty. Oqýshylarymyz halyqaralyq bilim saıystarynda top jardy. Sportshylarymyz álemdik dodalarda úzdik shyqty, Kók Týymyzdy jelbiretti, — dedi Qasym-Jomart Toqaev.
Prezıdent bıyl «Jumysshy mamandyqtary jyly» atap ótilgenin eske saldy.
— Eńbek adamdaryna aıryqsha qurmet kórsettik. Bul úrdis aldaǵy ýaqytta da jalǵasyn tabady. Memleket muǵalimder men dárigerlerge jan-jaqty qoldaý kórsetti jáne osy saıasat uzaq merzimdi strategııalyq sıpatqa ıe boldy. Elimizdiń mádenıet jáne ǵylym qaıratkerlerine jan-jaqty qoldaý kórsetildi. Adal eńbektiń qadirin biletin ulttyń keleshegi de jarqyn bolmaq. Óz kásibiniń naǵyz mamany bolǵan otanshyl azamattar elimizdiń kóshin alǵa bastaıdy. Osylaısha, HHІ ǵasyrdyń birinshi shıregin abyroımen aıaqtadyq. Ekonomıkalyq jáne áleýmettik kórsetkishter boıynsha Qazaqstan osy saıası-geografııalyq keńistikte kósh bastady. Bárimiz bir el bolyp Ádiletti, Qaýipsiz, Kúshti, Taza, Ozyq Qazaqstandy quryp jatyrmyz. Endi, mine jylqy jylyna aıaq basqaly turmyz. Qazaq úshin qazanattyń orny qashanda bólek. Halqymyz «Jylqy jyly jaıly bolady» dep yrymdaıdy. Biz kelesi jyldan kóp jaqsylyq kútemiz. Órkenıetti ult retinde alysqa kóz tigemiz. Alǵa qoıǵan bıik maqsatymyz jáne naqty josparymyz bar, — dedi Memleket basshysy.