HH «Boztorǵaı» baıqaýyna 800-den asa bala qatysady
ALMATY. QazAqparat - HH «Boztorǵaı» baıqaýyna 800-den asa bala qatysady. Bul týraly Almatyda Óńirlik kommýnıkatsııalar qyzmetiniń alańynda HH «Boztorǵaı» balalar shyǵarmashylyǵy halyqaralyq konkýrsy» dırektory Qarlyǵash Ábdikárimova aıtty, dep habarlaıdy QazAqparat tilshisi.
Baspasóz máslıhatyna kompozıtor, Qazaqstan Respýblıkasynyń eńbek sińirgen qaıratkeri, professor Keńes Dúısekeev, Reseı mádenıetiniń eńbek sińirgen qaıratkeri, Vıtebskdegi Slavıan bazarynyń Reseıdegi shtabynyń dırektory Nıkolaı Krıvenko, «Boztorǵaı» balalar shyǵarmashylyǵy halyqaralyq baıqaýynyń dırektory Qarlyǵash Ábdikárimova qatysty.
«Dástúrli «Boztorǵaı» balalar shyǵarmashylyǵy halyqaralyq konkýrsy Almatyda osymen jıyrmasynshy ret ótpek. Ótken jyldardaǵydaı konkýrs Almaty qalasynyń Ortalyq demalys parkinde ashyq alańda ótedi. Almaty qalasyna Qazaqstannyń barlyq aımaqtarynan jáne Qyrǵyzstannan, Ózbekstannan, Reseıden, Belarýsten, Ýkraınadan, Armenııadan, Grýzııadan, Ázerbaıjannan, Lıtvadan, Latvııadan, Bolgarııadan, Italııadan, Chehııadan jas ónerpazdar kelmek. Konkýrsqa 800-den asa bala qatysady», - dedi baıqaý dırektory Qarlyǵash Ábdikárimova.
Aıta ketý kerek, «Boztorǵaı» baıqaýynda 4 atalym bar. Kez kelgen 17 jasqa tolmaǵan bala vokaldy estrada, halyq ánderi, horeografııa, balalar sán teatry boıynsha baq synaı alady.
Úzdik shyqqan ónerpaz Belarýstiń Vıtebsk qalasynda ótetin «Slavıan bazary» baıqaýynda el namysyn qorǵaıdy.
Illıýstratsııalyq foto
