«Hezbolla» jańa basshysyn saılady
ASTANA. KAZINFORM – Lıvannyń «Hezbolla» qarýly toby seısenbi kúni Izraıldiń Beırýt qalasynyń ońtústik mańyndaǵy áýe shabýylynan bir aıdan astam ýaqyt buryn qaza tapqan bas hatshy Hasan Nasrallanyń ornyna sheıh Naım Kasemdi saılaǵanyn málimdedi, dep habarlaıdy Kazinform menshikti tilshisi.
Topqa jaqyn Al Manar telearnasy jarııalaǵan «Hezbollanyń» jazbasha málimdemesinde Shýra keńesi belgilengen tańdaý mehanızmine sáıkes 71 jastaǵy Kasemdi bas hatshy etip saılaǵany aıtylǵan.
«Hezbolla» málimdemesinde Kasemniń bul qyzmetke «Hezbollanyń» ustanymdary men maqsattaryna adaldyǵy» úshin tańdalǵanyn aıtyldy.
Nasrallanyń nemere aǵasy Hashem Safı ad-Dın buǵan deıin «Hezbollany» basqaratyn favorıt sanalǵan, biraq ol 27 qyrkúıekte Nasralla qaza bolǵannan keıin kóp uzamaı Izraıldiń Beırýtke jasaǵan soqqysy kezinde mert boldy.
71 jastaǵy Kasemdi «Hezbolladaǵy» ekinshi adam» dep ataıdy. Ol 1980 jyldardyń basynda bul topty qurǵan jáne sheıittik saıası belsendilik tanytqan din ǵulamalarynyń biri.
Ol 2006 jyly toptyń Izraılge qarsy soǵysynan keıin Nasralla jasyryn áreketke kóshkennen keıin de «Hezbolla» tobynyń kópshilik aldyna shyǵýyn jalǵastyrǵan eń joǵary laýazymdy sheneýnik boldy.
1991 jyly toptyń sol kezdegi bas hatshysy Abbas ál-Mýsavı Naım Kasemdi «Hezbolla» jetekshisiniń orynbasary etip taǵaıyndady. Ál-Mýsavı kelesi jyly ızraıldik tikushaq shabýylynan qaza tapty.
Kasem Hasan Nasralla jetekshi bolǵan kezde óz ornyn saqtap qaldy jáne uzaq ýaqyt boıy «Hezbollanyń» jetekshi ókilderiniń biri boldy. Ol Izraılmen shekarada soǵys júrip jatqan sońǵy bir jylda da sheteldik BAQ-qa únemi suhbat berip júrdi.
Nasralla óltirilgennen keıin Kasem teledıdardan úsh ret málimdeme jasap, sonyń birinde, 8 qazanda bir sózinde toptyń Lıvandaǵy atysty toqtatýǵa qol jetkizý kúsh-jigerin qoldaıtynyn málimdedi.
Qasem 1953 jyly Beırýtte Lıvannyń ońtústiginen kelgen mıgranttar otbasynda dúnıege kelgen. Onyń saıası qyzmeti qazir «Hezbollanyń» odaqtasy lıvandyq «Amal» sheıittik qozǵalysynda bastaldy.
Izraıl bul taǵaıyndaýǵa qatysty pikir bildirdi.
Izraıl úkimetiniń X áleýmettik jelisinde arab tilindegi resmı akkaýntynda «Hezbollanyń» jańa basshysyna qoqan-loqqy jasaǵan habarlama jarııalandy.
«Eger ol ózinen burynǵy Hasan Nasralla men Hashem Safıeddınniń izimen júrse, onyń bul laýazymdaǵy qyzmeti osy lańkestik uıymnyń tarıhyndaǵy eń qysqa bolýy múmkin», - delingen habarlamada.
Eske sala ketsek, buǵan deıin Izraıl armııasy «Hezbolla» jetekshisi Hasan Nasrallanyń óltirilgenin habarlaǵanyn jazǵan bolatynbyz.
