«Hezbolla» Lıvanda frantsýz bitimgeriniń ólimine qatysy baryn joqqa shyǵardy
ASTANA. KAZINFORM — 18 sáýir kúni lıvandyq «Hezbolla» Ońtústik Lıvanda Birikken Ulttar Uıymynyń ýaqytsha kúshteri (UNIFIL) quramynda qyzmet etken frantsýz sarbazynyń qaza tabýyna jáne taǵy úsh áskerı qyzmetshiniń jaralanýyna baılanysty oqıǵaǵa qatysy joq ekenin málimdedi, dep jazady Anadoly.
Uıym málimdemesinde Gandýrıııa aımaǵynyń Bınt-Djbeıl okrýginde bolǵan oqıǵaǵa «Hezbollanyń eshqandaı qatysy joq ekeni» atap ótildi. Top sondaı-aq jaǵdaı tolyq anyqtalmaıynsha, asyǵys qorytyndy jasap, aıyp taǵýdan saq bolýǵa shaqyrdy.
«Hezbolla» jergilikti turǵyndar, UNIFIL jáne Lıvan armııasy arasyndaǵy úılestirýdi jalǵastyrýdyń mańyzyn atap ótip, aımaqtaǵy jaǵdaıdy «shıelenisti» dep sıpattady. Sonymen qatar keıbir taraptardyń aldyn ala aıyp taǵýyn synǵa alyp, UNIFIL kúshterine jasalǵan ózge shabýyldar kezinde únsiz qalǵanyn da eske saldy.
Frantsııa prezıdenti Emmanýel Makronnyń X áleýmettik jelisinde jarııalaǵan málimetinshe, shabýyl saldarynan 17-shi parashıýttik ınjenerlik polkiniń aǵa serjanty Florıan Montorıo qaza taýyp, úsh áskerı qyzmetshi jaralanǵan.
— Barlyq derek bul shabýylǵa «Hezbollanyń» jaýapty ekenin kórsetedi, — dep qosty ol.
UNIFIL ókilderi óz pozıtsııalarynyń beıresmı qarýly toptar tarapynan oqqa ushqanyn habarlap, oqıǵaǵa qatysty tergeý bastalǵanyn málimdedi.
Budan buryn Izraıl men Lıvan arasynda 10 kúnge atysty toqtatý týraly kelisim jarııalanǵan soń álem elderiniń basshylary men úkimet ókilderi bul bastamaǵa qatysty pikir bildirdi. Halyqaralyq qaýymdastyq bitimdi quptap, taraptardy kelisimdi tolyq saqtaýǵa jáne shıelenisti ýshyqtyrmaýǵa shaqyrdy. Kazinform agenttiginiń tilshisi negizgi málimdemelerge sholý jasady.
