«Hezbolla» Izraılmen tikeleı kelissózderdi joqqa shyǵardy

ASTANA. KAZINFORM — Shııttik qozǵalys yqtımal dıalogqa qatysty óz sharttaryn usynyp, Lıvan bıligin ishki konsýltatsııalar ótkizýge shaqyrdy, dep habarlaıdy Kazinform agenttiginiń Taıaý Shyǵystaǵy menshikti tilshisi.

«Hezbolla» uıymynyń bas hatshysy Naım Kasem dúısenbi kúni Lıvanda Izraılmen tikeleı kelissózder júrgizý múmkindigi talqylanyp jatqan tusta málimdeme jasady. Ol mundaı baılanys formatyn qabyldamaıtynyn aıtyp, qozǵalys qarýsyzdaný máselesin talqylaýǵa nıetti emes ekenin rastady. Bul týraly «Al-Manar» telearnasy habarlady.

Onyń aıtýynsha, kez kelgen baılanys tek birqatar shart oryndalǵan jaǵdaıda ǵana múmkin. Atap aıtqanda, qurlyqta, teńizde jáne áýede jasalyp jatqan shabýyldardyń toqtatylýy, Izraıl áskeriniń basyp alynǵan aýmaqtardan shyǵarylýy, tutqyndardyń bosatylýy, turǵyndardyń óz qalalary men aýyldaryna oralýy jáne ınfraqurylymdy qalpyna keltirý talap etiledi.

Kasem sondaı-aq Lıvan bıligin tikeleı kelissózderden bas tartyp, janama formatqa kóshýge shaqyrdy. Sonymen birge «qarsylyqty» qylmystandyrýǵa baǵyttalǵan sheshimderdi qaıta qarap, ishki dıalog bastaýǵa úndedi.

— Biz qarýdan bas tartpaımyz jáne qarsylyqty jalǵastyramyz. Qandaı qaýip bolsa da, sheginbeımiz, moıymaımyz jáne jeńilmeımiz, — dedi ol.

Onyń sózinshe, AQSh-tyń qoldaýyna qaramastan, Izraıl 2024 jylǵy 23 qyrkúıekten beri júrgizip jatqan áskerı naýqanynda kózdegen maqsattaryna jete almady.

— Qarsylas tyǵyryqqa tireldi, al qarsylyq turaqty kúıinde qalyp, ony jeńý múmkin emes, — dedi Kasem.

Onyń málimdeýinshe, «Hezbollanyń» áleýeti «sarqylmaıtyn» kúıde qalyp otyr, al Izraıl kúshteri kútpegen deńgeıdegi qarsylyqqa tap bolǵan. Uıym basshysy qozǵalys Izraıl áskerin shyǵarý men Lıvannyń ońtústigine turǵyndardy qaıtarý maqsatynda kúresti jalǵastyratynyn aıtty.

Sondaı-aq ol qozǵalys naýryz aıyna deıingi jaǵdaıǵa qaıta oralmaıtynyn jáne Izraıl áreketterine jaýap berýdi jalǵastyratynyn jetkizdi.

N.Kasemniń aıtýynsha, toptyń áskerı is-qımyldaryn jalǵastyrýy Izraıl basshylyǵy úshin eldiń soltústiginde qaýipsizdiktiń qalpyna kelgenin málimdeýdi qıyndatyp otyr.

Oqı otyryńyz:

Lıvan men Izraıl arasyndaǵy bitim úsh aptaǵa uzartyldy — Tramp.

Izraıl shabýyldarynan Lıvanda qaza tapqandar sany 2509 adamǵa jetti.

30 jyldaǵy alǵashqy kelissózder: Vashıngtondaǵy Izraıl men Lıvan kezdesýi neni bildiredi.