«Hezbolla» Izraılge shabýyl jasamaq boldy – Netanıahý
ASTANA. KAZINFORM – Sársenbi kúni Izraıl premer-mınıstri Bınıamın Netanıahý «Hezbollanyń» lıvandyq jasaqtarynyń jerasty týnnelderi arqyly djıpter men zymyrandardy paıdalana otyryp Izraılge shabýyl jasamaq bolǵanyn áshkere etkenin málim etti. Bul týraly Kazinform-nyń menshikti tilshisi.
Izraıl basshysy Frantsııanyń CNews jáne Europe 1 telearnalaryna bergen suhbatynda atalǵan shabýyl sátti iske asqanda HAMAS-tyń byltyrǵy shabýylynan da joıqyn bolar edi degen boljamyn jetkizdi.
«Shekaradan 100-200 metr jerde Izraılge basyp basyp kirý úshin daıyndalyp jatqan týnnelderdi taptyq. Bul 7 qazandaǵydan da aýqymdy shabýyl bolar edi», - dedi Netanıahý.
Aıta keteıik, búgin Izraıl Sırııa astanasy Damask pen sol eldiń batysyndaǵy Homs qalasy mańyndaǵy áskerı nysandarǵa soqqy jasady.
Damaskiniń ortalyq aýdany Kafr-Sýsaǵa jergilikti ýaqytpen tańǵy 3:40-ta soqqy jasaldy. Taǵy bir soqqy Homs provıntsııasyndaǵy áskerı nysanǵa jasalǵan.
Sırııa qorǵanys mınıstrliginiń málimetinshe, áýe shabýylynan bir sarbaz qaza taýyp, jeteýi jaralanǵan. Sonymen qatar túrli materıaldyq shyǵyn da kelgen.
