Hezbolla Izraıldiń Lıvan áskerı qyzmetkerlerine jasaǵan shabýylyn aıyptady
ASTANA. KAZINFORM – Lıvannyń shııttik «Hezbolla» qozǵalysy Izraıl dronynyń Lıvan armııasynyń kóligine jasaǵan soqqysyn qatań aıyptap, Beırýt bıligin el egemendigin qorǵaı almady dep synǵa aldy, dep habarlaıdy IRNA.
Uıymnyń resmı málimdemesinde shabýyl saldarynan Lıvan qarýly kúshteriniń úsh áskerı qyzmetkeri qaza tapqany aıtylǵan.
«Hezbolla» bul oqıǵany Izraıldiń Lıvan aýmaǵyna qarsy júrgizip otyrǵan shabýyldarynyń jalǵasy dep baǵalady.
– Bul – Lıvan qalalary men aýyldaryna, ásirese eldiń ońtústigi men Bekaa ańǵarynyń batys bóligine baǵyttalǵan shabýyldardyń jalǵasy bolyp tabylatyn nysanaly ári qoryqqandarynan jasalǵan qylmys, – delingen qozǵalys málimdemesinde.
Shabýyl saldarynan Lıvan armııasynyń eki ofıtseri men bir sarbazy qaza tapqan.
Sonymen qatar uıym Lıvan bıliginiń áreketsizdigin synǵa alyp, bolǵan jaǵdaıǵa Beırýttyń da belgili bir deńgeıde jaýapty ekenin málimdedi.
– Bul oqıǵa ulttyq egemendikke nemquraıly qaraýdyń, azamattardyń ómirine salǵyrt qaraýdyń jáne nátıjesiz ymyralardyń zańdy saldary boldy. Sońǵy mysal retinde Vashıngtonda qarsylas qoıǵan talaptarǵa tolyqtaı kóný jaǵdaıyn ataýǵa bolady. Mundaı saıasat Izraıl rejımin jańa agressııalarǵa jáne Lıvan halqy men armııasyna qarsy áreketterin jalǵastyrýǵa yntalandyrady, – dep málimdedi «Hezbolla».
Sońǵy aılarda Izraıl men Lıvan shekarasyndaǵy jaǵdaı qaıtadan shıelenisip, taraptar arasynda áýe shabýyldary men atystar jıilegen.
Aıta keteıik, Lıvanda Izraıl shabýyldarynan qaza tapqandar sany 3 558 adamǵa jetti.
