«Hezbolla» Álı Hameneıge qastandyq jasaýdyń saldary aýyr bolatynyn eskertti

ASTANA. KAZINFORM – Lıvandyq sheıit qozǵalysy men «Hezbolla» toby jáne Iraktyń uly aıatollasy Álı Sıstanı Irannyń joǵary kóshbasshysy aıatolla Álı Hameneıge qastandyq jasalatyn bolsa, onyń sońy qıyn bolatyny týraly eskertý jasady, dep habarlaıdy Kazinform menshikti tilshisi.

Lıvan tobynyń málimdemesinde rahbardy óltirem dep qorqytýdyń sońy aýyr jaǵdaıǵa ákelip soqtyratyny aıtylǵan.

Qozǵalys ókilderiniń sózinshe, osyndaı málimdeme jasaýdyń ózi ıslamǵa tabynýshy júzdegen mıllıon adamnyń namysyna tııý bolyp tabylady.

- Biz búgin bárimiz bir adamdaı, senimdi túrde oǵan qorǵan bolyp turmyz,- delingen málimdemede.

«Hezbolla» Izraıldiń Iranǵa soqqy jasaýyn aıyptaǵanymen ázirge ashyqtan-ashyq soǵysqa kirisken joq. Izraıl tarapynan jasalǵan shabýyldardyń alǵashqy tolqynynan keıin top Lıvan bıligin ózderiniń qaqtyǵysqa aralaspaıtynynan habardar etken edi.

Irak sheıitteriniń rýhanı kóshbasshysy aıatolla Álı Sıstanı bolsa, Iran bıligine baǵyttalǵan kez kelgen áreket óńirde keń aýqymdy apatqa ulastyrýy múmkin ekenin málimdedi.

- Bul Iran halqynyń qaıǵy-qasiretin odan saıyn údete túsedi jáne barlyq taraptardyń múddesine qaıshy bolady, - dedi ol.

Jaǵdaıdyń ýshyǵa túsýine oraı Iran Syrtqy ister mınıstriniń orynbasary Kazem Garıbabadı AQSh-ty qaqtyǵysqa tikeleı aralasýdan aýlaq bolýǵa shaqyrdy.

Iran BAQ-taryna bergen suhbatynda ol Vashıngton kúsh kórsetýge umtylǵan jaǵdaıda Iranda oǵan qarsy qoldanatyn tásilder jetkilikti ekenin jetkizdi.

- Eger AQSh Izraıl jaǵyna shyǵatyn bolsa, Iranǵa qolda bar tásilderdi qoldanyp, qarsylyq tanytýyna týra keledi. Biz amerıkalyqtarǵa Izraıl agressııasyn toqtata almaıtyn bolsa, eń qurymasa janjalǵa aralaspaýǵa keńes beremiz,- dedi ol.

Osyǵan deıin Tramp Izraıl men Iran arasynda beıbitshilik ornatýǵa ýáde bergeni týraly jazdyq.